小辰光，中浪向，放学回去喫中饭。踏进弄堂，家家门洞子里、灶披间的窗口里飘出的饭香，扑面而来，本来就已经饥肠辘辘，一闻饭香，馋唾水流到胸口头，屏也屏勿牢，一个一个小鬼头侪象一只一只饿狼一样，极吼拉吼朝屋里向奔，觉着搿个是一日天当中最美好的时光了。后来人慢慢交大起来，弄堂里的饭香好象越来越淡了，自家烧饭厨房间里也勿大闻得到小辰光的饭香了。今朝朋友送了两小包“沙漠净米”拨了我，讲遐气灵光，我也听过算过，勿抱希望，因为超市里各种各样米侪买过了，总归寻勿回来小辰光的味道。回到屋里烧了一小包，等到饭熟，打开电饭煲，飘出了久违的饭香，饭粒雪雪白，亮光光，吃一口又糯又香，好象终于寻到小辰光的味道、小辰光的感觉了。喫一碗好米烧的饭，适意，捂心！是阿拉平常人平常生活中的平常快乐。