現年39歲嘅2004年港姐亞軍朱慧敏（Queenie）今日爆出與42歲心臟科專科醫生陳良貴入紙申請註冊結婚。據資料顯示，陳良貴（Jason）係養和醫院心臟科專科醫生與香港大學內科學系名譽臨床助理教授，朱慧敏同陳良貴報稱住址於半山司徒拔道。

陳良貴於2018年曾林盛斌（Bob）做「通波仔」手術。手術成功後，Bob除咗多謝陳醫生外，仲喺IG公開同對方嘅合照，開post幫陳醫生徵女友，「事業有成、有上進心，絕冇不良嗜好，成熟、穩重、工餘時間熱心公益，我係女人會主動溝佢，而個重點係……佢單身」。

Bob回覆《晴報》時冇直認係咪自己做媒人，但就話好戥佢哋開心，「哈哈，詳情你問返Queenie啦！總之我祝佢哋幸福美滿，甜甜蜜蜜，知道呢個消息，非常開心，好感恩！」

朱慧敏入行以來，情路比事業更有睇頭，與EO2成員彭懷安（Eddie）拍拖7年，以為感情穩定。2015年，Eddie向朱慧敏求婚，為表誠意更特意於女方亡母墳前求婚，仲隨即於社交平台post合照宣布婚訊。

二人之後被影到金行揀首飾金器，密鑼緊鼓籌備婚事。未幾Eddie卻爆出偷食風波，婚期數度押後，同年9月朱慧敏坦承回復單身。二人就係咁兜兜轉轉、轉轉兜兜，分手又唔係，復合又唔係。

直至去年2月，Eddie接受訪問時表示，感恩有這段7年情，並曾努力經營過。而朱慧敏隨即網上發文「指控」對方常玩失蹤，嚟一個狠狠嘅斬纜。至於男方亦喺去年3月成家立室，太太Ivy係任職保險的圈外人。