本身冇特別想買尾場，純粹咁啱買飛嘅時候480×2係尾場；可能因為唔係刻意買尾場，所以命運出入地，今日真係唔係尾場

又因為候補到琴日880嘅飛，所以連續睇咗兩晚

感覺上兩場好睇程度係冇分別，佢話「你哋放心，之後嘅尾場一定唔會好睇得過今場。」喺佢帶頭盔之前，我已經心諗，咁之後尾場一定都唔會唔好睇過今場，因為係會一樣咁好睇。

完場又去等，其實琴日經已算係集咗郵，今次等係想將琴日未寫完嘅信交比佢。

今晚等得耐過琴日，等嘅人都多過琴日。佢終於出嚟，說笑幾句，有fans問可唔可以送信，見佢欣然接受，我又順勢行前兩步遞出我封信。佢雙手接過，竟然冇其他人再遞嘢比佢。

我見佢手握個牛皮紙信封，諗盡咗一切封信有可能遭遇嘅最悲慘結局；但我見佢握得好緊，手指觸碰到我貼喺封口位嘅鱷魚貼紙……我覺得好安心。

人群漸散後，我哋被告知裡面所有人已經走曬，先知原來佢哋可以行另一個出口走。

我起初以為佢係一定要行哩個出口，所以被迫營業同fans影相，原來佢係可以唔使行哩個出口，直接上車走……

感恩，佢欣然收低兩封信；
感恩，迷戀咗多年嘅黃生原來真係咁珍視fans；
感恩，聽日要早起嘅唔追星嘅男朋友願意陪我默默無盡地等。

有啲嘢唔係想付出，對方就一定要接收。

今晚好開心，有種釋懷嘅感覺。
#黄子华##最后礼物#