#美丽战场#｜剧情暴走遭网民闹爆 叶念琛：所有嘢都系我一早计算好哂

由叶念琛监制、编剧及导演的无线55 周年台庆剧《美丽战场》，昨晚播出结局后，即晚深夜即以逾二万搜寻登上Google Trend首位；该剧在内地同样掀起讨论热，昨晚更一度先后杀上微博热搜、微博实况热聊，以及新浪热榜。不少人涌入叶念琛Facebook留言怒骂，更有人为他开设关注组，名为「叶念琛美丽战场结局导致叶伯母被疯狂问候关注组」，网民写道：「拍到电视剧，拍到要开个关注组X，渠都应该系第一个」、「睇咁多年剧未试过想闹导演」。

监制叶念琛亲解大结局所有谜团，特别为何用开放式结局，他说：「我当然知道有几个位，观众会觉得好大争议性，第一个一定系open ending，但其实好多港剧都系open ending好似《流氓大亨》Do 姐最后流嗰滴眼泪，《白色强人》Ali究竟有冇死到？我觉得系因为个热度，大家好投入啫，咁其实TVB好多剧都系open ending，我唔觉得呢个系好大胆慨做法。」

「我安排蒋家旻最后出返嚟之后就完，不过我明，大家好投入慨时候，我系呢个位就完咗，我知大家会有好大反应，大家觉得意犹未尽最好，唔通结局又去返啲烧嘢食咩？但其实几个角色都有圆满结局，徐富贵（林盛斌饰演）、李静儿（刘佩玥饰）、钟家宝(陈滢饰)每个都有哂结局，方力申点解会失踪，我觉得呢个系一个趣味，起码大家知系道渠上船饮酒系揭发渠老豆（姜大卫饰）同朱晨丽慨秘密，所以方力申先咁嬲。」

除了open ending 有争议外，监制叶念琛亦解一下最尾一场的伏线，「陈滢接到电话系咪渠老公打嚟？咁就要睇每个人点去阅读剧情，系咪渠老公（方力申）打嚟，或者唔系方力申打嚟都可以系呢个来电显示架，而蒋家旻问陈滢咁急去边？渠系咪知道陈滢搵紧方力申呢？我觉得蒋家旻再出现， 一定要有呢个shocking位，其实观众可以再阅读，唔系因为我懒惰，系我觉得剧情令到观众有联想系最好慨，我只可以话绝对有哂材料，有晒伏线，可以有season 2，咁当然系睇大家想唔想有啦，唔系我话有就有，（徐富贵有喺花樽装cam?)呢个又两睇，花樽系渠送，但其他嘢唔系喎。」

结局有多个悬念，令观众反应激烈，甚至有网民觉得烂尾，原来一切都是叶监制的设计，「我想讲一样嘢，我唔系懒惰所以唔写结局，其实小美（陈晓华饰）死已经系一个结局，钟家宝（陈滢饰）已经众叛亲离，最后嗰个其实系一个伏线，其实好多剧都有open ending，《大时代》周慧敏最后有冇死呢？但今次《美丽战场》慨结局，有悬疑性、趣味性系我想有慨，而《美丽战场》由首播到大结局，我都系希望一直咁有争议性，一定有人话我烂尾，但我一定唔觉烂尾，所有嘢都有铺排，平心而论，今晚大结局真系剧力万钧，一集咁多嘢发生，林小美死嗰场，我相信好多人都感动，我知网民慨反应，但所有嘢都系我一早计算好哂，唔系点会咁有争议性呢？但我唔系一部神经错乱慨剧集，我只系有啲地方留白。」