中超最后一位大牌球员奥斯卡的去向终于确定。回归巴西联赛显然是他目前能够争取到的最佳结果。

想起了前两周偶遇小区邻居时的一段对话。

邻居：老娄啊，我一直想问侬呀，迭个奥斯卡到底留下来伐啦？我看伊前两天比赛结束以后感谢现场观众激动的来，眼泪水淌淌滴，我倒也蛮感动呃。

我：唉，老兄啊，据我晓得奥斯卡实际上也想留下来呃，但是年薪实在太高，远远超出中国足协定下来个外援工资标准，所以搞勿定呀。。。

邻居：勿是有新闻讲伊愿意降薪一半吗？？？

我：降薪一半还是太高呀。。。侬想，奥斯卡现在个年薪是2600万欧，砍脱一半是1300万，中国足协定个工资帽只有300万，差距还是大的来勿得了，哪能弄啦？

邻居：个么海港俱乐部就呒没想过其他办法来解决吗？老早申花队签德罗巴个辰光勿是就动过脑筋另外签一份游戏代言合同，两条腿走路呀。。。

我：哈哈哈，侬老兄记性好呃，德罗巴当年个情况还记得清清爽爽。但是侬晓得伐，迭种生活勿出事体当然是侬好我好大家好，一旦出事体个闲话，外籍球员告到国际足联去，阿拉个俱乐部分分钟拨处罚。所以对俱乐部来讲风险太大。。。

邻居：个么，还有其他啥办法伐啦？

我：现在国际廊厢倒是有另外一种变通方式，叫做延迟支付。美国人用了最多。就是俱乐部交球员签一份长约，比如讲8年，甚至10年，支付个辰光呢采取前头几年少付，后头几年多付个方式。我举只例子：去年年底，美国洛杉矶道奇队，棒球队，交日本明星大谷翔平签约10年，总价是7亿美金。但是考虑到道奇队每年个工资帽，俱乐部只好交大谷翔平商量7亿美金个支付方式。结果就变成合同期10年里厢，球队每年只支付拨伊200万美金，10年也就是2000万美金。等到大谷退役之后，道奇俱乐部再掿剩下来个6.8亿美金支付完成。

邻居：啊？？？迭个吓人，迭个合同日本人也肯签下来啊？？？

我：呵呵，是呀。。。洛杉矶道奇已经140年历史了，球队品牌个知名度信誉度摆了全世界面前。所以大谷翔平愿意相信也敢于相信俱乐部勿会得喇叭腔。参考大谷翔平，要么海港俱乐部学习一下：交奥斯卡续约3年，总价3900万欧。但是每年只支付300万，因为要符合中国足协个标准，3年么就是900万，剩下来个3000万等到合同结束之后再支付。

邻居沉默良久，终于又说：我相信美国人俱乐部大概能做到，但是阿拉此地估计随便哪能也签勿出来迭种合同伐。。。