同大家介紹已經嚟咗我屋企個幾月嘅新成員：龍兒，小龍女。無錯，就係金庸小說「神鵰俠侶」入面嘅小龍女。佢係屬於紅綠金剛鸚鵡，一歲幾。佢識講咩？「哈佬」同「做緊咩啊？」佢係一黎到就識㗎喇，唔係我教嘅，不過唔知點解，係佢唔鍾意定係點，佢唔鍾意飛，同埋好驚學飛，撞嚟撞去咁，搞到我都驚同佢練習，希望大家俾啲建議我，唔該晒。

龍兒最特別嘅地方係好鍾意男人，異性相吸，仲特別黐我，好嗲我，好似個BB咁。原來龍兒個身冇味，啲便便又唔臭，暫時都好似好容易打理。不過咁，龍兒就唔係好識做人，可能佢真係唔係人，冇大冇細。連我阿媽同姐姐都唔俾面，佢哋想摸佢都唔俾㗎，凶神惡煞想食咗人咁，但最經常照顧佢其實就係呢兩位阿姐喎。偏偏佢就真係當咗人哋係姐姐，老馮照顧佢起居飲食，清潔佢啲大小便咁，真係大支野。又要求建議，事關佢有成六七八十九年命，真係有排相處，及早攪好關係，對大家都有好處㗎嘛。