賽前邊會有人估到排15位嘅科莫可以搞掂榜首嘅拿坡里？！拿坡里今季暫時輸咗四場，對手分別係維羅納（0-3）、亞特蘭大（0-3）、拉素（0-1）以及本場嘅科莫（1-2），干地似乎喺某d環節還係有待提高。科莫本場表現出來嘅效率幾高，場面控制亦都唔差，尤以柏斯嘅表現值得一讚。

費倫天拿前鋒堅恩頭部受傷一度暈倒，隨即送到醫院接受檢查，希望並無大礙。費倫天拿最後25分鐘先後缺少堅恩同盧卡雲尼阿里，攻守實力大受影響，呢段時間亦未能製造任何埋門。中堅哥莫素同左後衛柏利斯都表現得唔錯，後者嘅傳中質素頗具功架。費倫天拿近七場聯賽，只有一場下半場取得入波。至於季中加盟維羅納嘅法國中場貝尼迪，就取得個人第一個意甲入波。

加斯柏連尼週中將盧克文收埋放後備，結果亞特蘭大被淘汰。呢場作客安坡里，盧克文以主力身份登場就即刻唔同曬。「真藍黑」全場14次埋門有8次中龍，反觀安坡里只有可憐嘅一次，呢個分野都幾大。盧克文梅開二度，本季入球累積到13粒。隊友列特古爾就更「把炮」，目前以21粒入波遙遙領先射手榜，睇怕神射手都可以收入囊中。

華荷域一箭定江山，祖雲達斯作客贏卡利亞里又添一勝，正式拋開拉素重返榜四。