由於施爾臣受傷，拉斯帕馬斯近三場起用克羅地亞守門員賀卡斯把關，上半場有兩次非常精彩嘅撲救，係贏波嘅重要功臣。上半場馬德里體育會可以製造到多啲機會，兩邊傳中更有威脅，下半場幾次換人之後，威脅仲減低咗。拉斯帕馬斯中前場有幾位球員特點鮮明，算係人腳配搭唔錯嘅下游球隊，而家跳上尾四位置，睇下最終可唔可以逃出生天。

呢場波都幾奇情，維拉利爾嘅詐糊波（3球）比合法入球 （2 球）還要多。「潛水艇」今季平均控球率只有 48.5%，好似今場咁主導比賽，進攻空間較少，射門轉化入球嘅比率反而較低。守門員路爾斯祖利亞犯上嚴重錯誤，相信短期內好難再有正選。艾約斯皮里斯入到今季聯賽第14球，繼續成為球隊首席射手。皇家蘇斯達有七個球員缺陣，陣容唔係太完整，比賽過程嘅調動比以往有更多針對性同戰術性部署，特別係半場之後改踢三中堅五後衛，再喺下半場中段更換閘位球員去應對對方側擊。奧亞沙巴梅開二度，累積為球隊取得114個入波，繼續係球會史上第二多。

冇麥巴比更勝有麥巴比！今季麥巴比缺陣嘅賽事，皇家馬德里五場3勝2和，本場更有費達歷高華維廸遠射世界波一箭定江山。上一場聯賽皇家馬德里係靠踢中場嘅卡馬雲加入波小勝一球，今場係靠 83 分鐘先由右後衛推返上中場嘅費達歴高華維迪入波，起用不少副選球員嘅畢爾包都相當頑強，曼聯喺歐羅巴聯賽對著佢哋應該會相當吃力。

榜首嘅巴塞隆拿贏得相當驚險，後防嘅漏洞更加被切爾達嘅32歲射手伊高施亞斯完美捕捉，大演帽子戲法！若非「真大腿」拉芬拿表現神勇，主隊今場可否全身而退都要打個問號。

西甲32週賽事賽果:
愛斯賓奴1-0 基達菲
華歷簡奴1-1 華倫西亞
巴塞隆拿4-3 切爾達維哥
馬略卡0-0 雷加尼斯
拉斯彭瑪斯1-0 馬德里體育會
華拉度列2-3 奧沙辛拿
維拉利爾2-2 皇家蘇斯達
西維爾1-1 艾拉維斯
皇家馬德里1-0 畢爾包體育會
基朗拿🆚皇家貝迪斯（稍後時間進行）

#Laliga# 🇪🇸