#古天乐[超话]# StarTalk丨周秀娜太入戲嗌交嗌到聲沙 古天樂獲張國榮啟發獲益良多

古天樂 周秀娜 同 劉冠廷 作客《StarTalk》接受主播 王鎮泉 專訪，分享新戲中嘅合作點滴，今次古仔同娜姐喺戲中飾演夫妻，但有一半時間都係嗌交戲。娜姐話最深刻一幕係喺車入面嘅嗌交戲份，因為導演想佢哋一鏡拍到底，佢就太過投入嗌到聲沙。

劉冠廷憶起首次喺片場見到古仔時，頓時感覺到對方嘅氣場好強大，令佢唔敢企太近。不過古仔一次舉動就令佢好感動，當時古仔已經完成拍攝部份，但都留低陪佢對戲，令佢順利完成之後嘅戲份拍攝。

今次電影題材講述私家偵探，問到三位有冇方法防止被狗仔隊追蹤同偷拍？古仔話：「咪唔去街，呢個係最好嘅方法。」古仔話自己對於被人跟蹤嘅警覺性好高，不過明白對方只係工作，亦冇可能叫人唔好跟。娜姐話初入行時，身邊冇助手又冇車，有一次自己喺路邊等的士時，發現附近有採訪車跟蹤自己，最後索性走上前問對方邊間報館，叫對方順路車埋自己。

古仔之前預告，被笑稱為「都市傳說」嘅電影版《尋秦記》將於元旦上映，佢話已經做緊事前準備功夫。對於有指哥哥張國榮當初想搵佢參演電影《夜半歌聲》，但因為撞咗拍檔期而冇接，事後哥哥不時喺訪問中讚古仔，對此古仔表示獲前輩欣賞當然開心，亦喺哥哥身上學識，作為前輩要不停提攜後輩，而哥哥喺80、90年代嘅明星光芒係好利害，甚至影響海外嘅藝人。 http://t.cn/A6eFyaLT