德國隊官方消息指，隊長古莉婭格雲（Giulia Gwinn ）左膝內側韌帶MCL受傷，確定退出本屆歐國盃餘下賽事。而歐國盃規則，開賽後僅龍門受傷先可以啟用遞補方案，故德國將唔可以再揾人替代古莉婭，佢將提前返回德國，進行更詳細嘅診斷。

今次德國隊只有古莉婭一個正統右邊後衛，大軍之中蘇菲婭姬蓮夏妮（Sophia Kleinherne） 及卡露達雲莎（ Carlotta Wamser）都可以客串呢個位置，但就少不免打大折扣！

古莉婭2019首次參與世界盃就成為最佳年輕球員，但八強止步；之後兩次大賽都遭遇ACL大傷無緣冠軍；2025正式坐正隊長地位，但始終無法搣甩大賽嘅黑仔命！