身家輸咗一倍有凸，但係表現就更勝一籌！喺兩度兩後情況下又兩度追和比數，馬迪達令利物浦中路防守比較大壓力。而沙亞同門奴斯就令鎮守左路嘅卡基斯「冇啖好食」。
利物浦暑假大灑金錢，但中後場令人擔心，加上加雲貝治因為做爸爸缺陣，挨到互射12碼都係輸波，失落社區盾。稍感安慰係兩位新兵伊傑迪基同費寧邦都有貨交，後者更加係20分20秒入波，似係將入球送俾祖達嘅在天之靈。
沙拿射第一腳12碼一飛沖天都知不妙；相信水晶宮資料組做足功課，軒達臣水樽張貓紙應該寫得好清楚紅軍嘅起腳習慣，兩球捉路救得極靚，抵贏。
對上15年贏社區盾嘅球隊，只得一隊贏到英超，就係2018/19球季嘅曼城。輸波唔係世界末日，不過雲戴克出腳稍慢輸12碼，防守上亦不夠集中，想今季有好成績，真係要改善！
发布于 广东