賽前外界一致睇好巴黎聖日門能夠輕鬆獲勝，但實際都幾出乎大家所料。若論熱刺雲迪芬第一粒入波執雞都有點運氣，咁羅美路第二粒入波嘅頭槌就確實頂得真係幾靚，同時間代替唐納勞瑪嘅新進利爾龍門捷華利亞（Lucas Chevalier）第一次為巴黎把關，似乎還未發揮到最佳水平。領先兩粒，湯瑪士法蘭克睇到執教球隊後捧走第二個獎盃嘅希望…

理想歸於實，巴黎喺5分鐘後嘅「大軍壓境」令對手只能夠圍堵己方半場，李剛仁等後備入替之後，進一步受到嘅威脅就更大。干卡路拉莫斯補時嘅「絕命三分鐘」入波加上李剛仁喺85分鐘收窄紀錄嘅遠射，令熱刺上下90分鐘變得徒勞。雙方進入直接以十二碼分勝負嘅環節，首位出場嘅域天拿射失，喺雲迪芬出場前，熱刺依舊睇到獲勝希望。奈何呢位荷蘭後防唔爭氣，加上其後嘅泰爾（Mathys Tel）呃曬龍門兼呃埋自己（角度太盡射出底線）。結果巴黎聖日門再攬走埋今屆嘅歐洲超霸盃，完成季內豪奪五冠嘅壯舉（法甲聯賽、法國超級盃、法國盃、歐洲聯賽冠軍盃& 歐洲超霸盃），亦都係法國球會首次奪得該項賽事殊榮！