“得民心, 得天下” 特區政府必須挽回市民信心才可以改善經濟.

冼國林

好多人一直話我只識批評政府, 但係大家唔好忘記 “善意嘅批評是好過虛假嘅奉承”. 我今時今日不需要擦人任何人鞋或者攻擊他人博流量去獲得利益. 在黑暴期間我開冼師傅廣埸這個平台是希望提出好多意見幫助香港. 結果獲得好多人嘅認同和支持, 就係呢一點支持我繼續這個平台. 本來我已經移居內地, 都諗住唔講太多. 但係特區政府嘅表現令我哋呢一班老香港非常失望, 所以才繼續發聲, 為香港可以再發一點餘輝。
過去幾年特區政府,及各擦鞋仔不斷唱好, 但係實際上管治醜聞卻不斷發生.
七百幾萬買吹氣紅心汽球, 五千幾萬買夜光燈放灣仔海旁, 幾十萬在觀塘放靈堂式膠花, 垃圾膠袋事件, 去到近期嘅東涌站承建商用次級磁磚代替, 物料供應處長失職卻推算被騙了事. 直至到昨天, 籌備8年嘅國際氫氣球事件所謂國際盛事又醜態百出. 一件又一件, 簡直罄竹難書.
文體旅局長係一個最令人羨慕嘅局長, 因為寓工作於娛樂佢徹底做到喇. 出席所有演唱會,娛樂盛事, 由追星者變為明星要追返佢, 真是開心就不得了, 但係對香港整體經濟又有乜嘢幫助呢..
陳茂波 財政司司長除左不斷好似錄音機咁重複香港啲所謂經濟增長數字, 不斷吹水之外, 又有乜嘢新政策拼經濟呢? 除了見到他不停上電視接, 接受傳媒訪問之外,擦存在感之外, 乜都睇唔到。大鑼大鼓的熊貓經濟結果又如何呢, 大家有目共睹.
三年前我已經發表文章及視頻指出香港房地產面臨重大危機, 特別係商業樓同埋舖位. 建議政府停止推出商業用地. 在五年前我亦都講過, 特區政府嘅領導包括前行政長官一味叫人北上大灣區, 但卻無相對引入經濟對流政策, 這無疑係將香港嘅人才資金不斷流入大灣區, 慢慢淘空香港.
我對房地產嘅睇法, 甚至同好多地產專家嘅睇法都唔一樣. 政府辣椒推出嘅時候, 好多人話地產會復甦. 地產經紀當然希望係咁啦, 但我就話會更加加速 房地產向下跌， 最後係點大家心類有數.
最近我和一啲中型房地產發展和大型估價是行領導人午餐, 大家都開始同意我過去所講法. 我認為商業樓及地舖會再跌起碼30%, 甚至更多, 因為目前根本睇唔到個底喺邊. 住宅樓確實在最近成交多返少少, 但係七成以上買樓嘅人都係內地人, 因為本地好多人就算有錢都唔敢買樓. 理由係大眾市民對前景完全缺乏信心.
我亦都曾經講過政府派錢或者大量投資去推個高個GDP做數. 政府亦都希望藉著 “乘數效應, Mutiplier Effect” 去刺激經濟, 這一個基本經濟學理論係完全冇錯。 但係佢哋冇深入去研究一樣嘢, 就係當大眾市民對前景缺乏信心嘅時候, “乘數效應” 係完全冇作用, 甚至會出現逆行現象, Adverse Mutiplier Effect。
香港政府嘅首席經濟顧問, 我都批評咗佢好多次。 佢曾經講過香港只要加強推廣旅遊 就可以靠旅遊業振興經濟同埋本土消費, 佢講嘅嘢啱唔啱, 大家而家可以睇下。香港經濟靠一班唔夠班, 卻尸位素餐嘅官員統治, 市民點會有信心呢? 市民缺乏信心, 經濟如何可以大步前行呢?

要重振經濟, 首先要重建市民信. 要重建市民信心, 首先要征改善政府官員嘅表現開始。 我呢個講法並非單指財經官員, 而係所有政府部門嘅官員.
要改善政府部門表現, 就要重手換血, 貫徹 “ 能者上, 平者讓, 庸者去” .港澳辦應該全力支持特首大刀闊斧換一批新血, 為特區政府建做一個新氣象, 帶畀市民一個新希望. 繼而對新官員嘅表現密切監察, 人頭落地正正係表示出特區政府改革嘅決心.
市民在燃點了新希望之後, 如果跟住下來每個部門嘅表現都係達到市民嘅預期嘅話, 市民信心就一定會慢慢恢復, 之後推行嘅經濟政策就會順暢好多. “得民心, 得天下” 一個好簡單的道理, 相信小學生都知, 但係特區政府知道又會唔會做? 做唔做到徹底呢? 呢個就係問題所在.

2025年9月6日