介紹返，佢叫小霖，我棋人香港嘅好拍檔，
我嘅好兄弟，亦都係我好重要嘅人生教練。

由上年開始，約定咗，一年一次，兩條友，喺佢屋企，
開支靚嘅威士忌，食吓壽司同KFC，整兜印尼撈麵，
然後傾傾傾，講講講，吹吹吹，飲飲飲，食食食。

我哋會講吓公司嘅嘢，各自工作上面嘅嘢，
大家生活上嘅嘢，甚至生命入面嘅嘢。

仲記得上年，兩條麻甩佬，傾咗好多深情課題，
然後大家攬住一齊喊，好可愛，好搞笑，好正，
尋晚，我哋都同對方講咗好多心事，
亦都互相作出咗好多好重要嘅承諾，
我感覺到，大家在公在私嘅關係，又向前行多一步。

所以，我要話俾大家知：
由呢一刻開始，只要你見到「棋人」呢兩個字，
無論喺世界各地任何一個地方，任何一個城市，
我都要負上我嘅責任，好好去捍衛「棋人」呢個牌頭，
因為，我係其中一個小小嘅持份者。