馬德鐘開心再與觀眾見面 陳煒評李施嬅復合：係佢兩個人嘅事

藝人馬德鐘、陳煒今日現身商場，為將於本月19日播出的新劇《非常檢控觀》進行宣傳。二人於劇中飾演一對舊情人，馬德鐘直言十分開心能夠再與觀眾見面，皆因他的上一部劇集，已是3年前播出的《再見·枕邊人》。

馬德鐘在劇中飾演的男主角包希仁，患有極為罕見的「鏡反射觸覺症」。他坦言這個角色頗具難度：「因為個角色有鏡反射嘅能力，要感受唔同人的情緒，每一次都要將對方嘅喜怒哀樂表露出來，有痛苦、有無奈、有憤怒，心路歷程好複雜，演完都幾攰下。不過呢個角色好有挑戰性，相信唔會令大家失望。」

談及劇中「鐵三角」的分工，馬德鐘表示三人各司其職：「吳偉豪負責落手落腳查案、打鬥嘅戲份，大部分動作戲都交俾佢。賴慰玲就係智慧擔當，處理文書、分析線索。我就負責共情受害者，用我嘅特殊能力，捕捉案件嘅關鍵細節，然後大家一齊整合信息，破案。」

早前TVB行政主席許濤宣布會為員工加薪，並會論功行賞。二人接受訪問時笑言，若新劇收視理想，或有望獲得大利是。被問到若收視報捷，會否派福利晒美腿答謝觀眾，陳煒笑稱騷腿呢啲事留俾後生女就好。馬德鐘則隨即補充，指陳煒本身亦是選美冠軍，實在不容睇少。陳煒聽罷即笑言，之後的宣傳活動，裙子會愈來愈短。

另外，李施嬅近日因在內地節目《再見愛人5》中，與前度車崇健復合，而被網民狠批「戀愛腦」。曾與李施嬅有過劇集合作的陳煒表示有留意相關報道，她直言：「我覺得當初你梗係好鍾意呢個人，先會開始同佢拍拖，到最後復合，都係佢兩個人嘅事。」馬德鐘亦認同表示，認為最重要的是當事人開心就好。

#TVB[超话]#