大家好，我係白眉鷹王，即係莫家淦！

可能好多人都唔認識我，面目相當模糊。而認得我嘅，有啲會話以前成日睇我報道娛樂新聞，有啲就會話記得我係《愛回家》嘅保安，但唔記得王朝馬漢定係趙虎。

其實自己一畢業就入咗娛樂圈做娛樂新聞主播，之後陸續試過唔同崗位，做過旅遊節目，拍過劇集，做過春晚司儀，喺唔同舞台唱過歌，做過直播帶貨，自己仲出過個人單曲。每一份工作自己都會盡心盡力去做，希望大家喜歡。

而今次當知道有機會以藝人身份參加《中年好聲音4》時候，心情係興奮，但同時又有啲擔心。因為自大學畢業後我基本上無再參加過任何歌唱比賽，心入面懷疑自己得唔得呢？會唔會好快被淘汰？值唔值得去玩呢？

最後當然大家都知，我以白眉鷹王身份參加《中4》。當自己上到比賽台上，發覺原來真係好鍾意舞台，好鍾意唱歌。過程雖然緊張，但又好享受。

今日終於可以除低面罩以「莫家淦」示人，我唔知喺呢個比賽可以走到幾遠，亦唔知喺娛樂圈可以走到幾遠。總之，盡力，盡心，過好人生每一段旅程。

多謝大家支持，再次同大家介紹返返，我係白眉鷹王，即係莫家淦。
#中年好声音4#