陳德森宣布開拍新戲獻禮回歸30周年 集結古天樂張家輝佘詩曼吳彥祖
.
記者：陳導，今日宣布呢個全新電影計劃，可唔可以同我哋詳細講下？
陳德森：呢個計劃睇落簡單，但其實任務非常艱巨。我哋今次拍呢部戲，核心係為香港動作演員公會籌款，希望成立一個專項基金，去幫助年紀大、已經退役、或者身體有傷患的動作演員。當佢同我提呢個諗法嘅時候，我二話不說就應承咗——因為我自己都係拍動作片出身，一路以來多得呢班前輩同手足支持，先有今日的成績。

故事背景係1941年香港淪陷「三年零八個月」的抗爭歲月，事發喺已經淪陷的九龍，講一班人要完成一項不可能的秘密任務。主角方面，而家已經傾妥咗古天樂、張家輝、吳彥祖，女主角就傾咗佘詩曼；仲有兩個好重要的年輕演員角色，而家仲在最終敲定階段。

因為今次係為動作演員公會籌款，我哋邀請咗好多響動作片領域舉足輕重的前輩，包括洪金寶大哥、袁和平導演、徐克導演、李連杰先生、劉德華先生、元彪哥哥、元華大哥，仲有元奎、袁祥仁一班師兄弟，我哋甚至連郭富城都邀請埋。當然未必叫得齊所有人，但我哋會盡力，希望大家都為香港動作電影出一分力。仲有吳鎮宇哥哥，同埋香港電影入面經典的「四大家族」四大反派，全部都會出馬，觀眾入場會見到好多經典港產動作片的回憶同名場面。

我哋目標係今年年底可以順利開機，呢部戲亦都係合拍片，廣東省同佛山政府都非常支持，希望可以將呢部戲獻俾香港回歸30周年。我哋仲同鄭保瑞傾過，佢哋《九龍城寨》團隊，我哋希望大家可以win win，聯手做更多事。最近我都收到風，邱禮濤導演都要開拍動作片，其實唔係話邊個獨霸動作片市場，而係呢個類型，正正係我哋香港電影可以衝出全世界的王牌。我哋希望呢部戲唔止有華人市場，仲可以打入外國市場，重振香港動作片的雄風。

記者：咁大陣仗，製作費一定唔少，資金方面而家進度如何？
陳德森：講真，如果唔係為咗動作演員公會籌款，你畀一百萬一日，都未必請到呢班人其中一個出山。但而家呢班前輩同手足，全部冇同我哋講過錢，淨係話一定嚟支持、一定做。就算大家不收片酬，製作費都絕對唔便宜，但而家投資者反應非常踴躍，大家都好睇好呢部戲的前景。我哋今次總導演係黃海，我自己做監製，一定會俾大家交出一部誠意之作。