個故事係咁嘅….

話說十幾年前，啱啱入電視台開始拍節目嘅時候，
當時一廠化妝間嘅基哥同我講叫我自己都學吓化妝，
咁以後出外景嘅時候就唔使專登返嚟，慳返好多時間，
我見佢用Armani嘅化妝品幫我化，所以我就開始買。

仲記得第一次去專櫃買嘅時候，乜都唔識，
嗰個姐姐介紹我買一支類似牙膏外型嘅粉底，
因為好適合我呢啲簡簡單單，快快脆脆嘅男仔妝，
用咗一段時間，覺得幾好，跟住就keep住用。

好可惜，用咗一排，想要再買嘅時候，已經停咗產，
尊櫃嘅姐姐就介紹我用另一隻，叫做Maestero，
佢當時話呢個產品更加好，咁我就轉咗嘞。

又好可惜，用咗一排，想再買嘅時候，又停咗產啦，
專櫃嘅姐姐又介紹我用另外一隻，叫做Crema Nuda，
佢當時又話呢個產品更加好，咁我又轉咗啦。

再好可惜，用咗一排，想再買嘅時候，佢又停咗產啦，
專門店嘅姐姐再介紹我用另外一隻，叫做Luminous Silk，
我都好老實問佢係咪唔會再無啦啦又停產，
佢話應該唔會嘅，咁我就再轉咗啦。

好嘞，故事嚟到呢度，我諗你都估到個發展係點啦，
冇錯，早排我見到我手上呢支，差唔多就嚟用晒，
我就叫我助手落去幫我買嘅時候，
得到嘅回覆係：
「呢個Luminous Silk轉包裝，暫時全香港都冇貨！」

當我知道呢個消息嘅時候，唔係講笑，
個感覺就好似係你老婆不斷俾綠帽你戴，
你一次又一次原諒佢，最後頂帽都係由頭笠到落腳！

我同自己講：「呢段感情，要畫上句號嘞。」

可能係我唔服輸嘅性格，我覺得要親自再求證多一次，
我先打電話去朗豪坊Armani專櫃，冇人聽，
然後我就再打電話去銅鑼灣SOGO 專櫃，
嘗試問多一次，嗰位姐姐都係同一個回覆，
當我準備收線嘅時候，唔知係咪我把聲太易認，
佢問我：「你係咪Bob？」

原來之前佢係喺又一城專門店嗰度做嘅，
我曾經去過嗰度買嘢，佢記得我，而家調咗去銅鑼灣，
當佢知道我嘅故事之後，佢好努力嘗試挽救呢段關係，
亦都俾咗好多安慰、鼓勵、建議同選項我。

最後，我決定，為咗頭家，俾多一次機會。

喺度同咁多位Armani Beauty嘅管理層講，
希望你哋可以幫我同總公司反映一下，
出咗一個產品，就唔好成日停產，唔好成日轉包裝，
呢個真係對好似我哋呢類咁專一同忠心嘅顧客，
係會感覺到好氣餒同埋好大打擊嘅，
亦都希望你哋可以好好珍惜呢位銅鑼灣SOGO嘅Tasha，
呢個同事真係冇得頂，100分，請你哋快啲加佢人工，
喺而家呢個社會，可以有一個咁為公司嘅夥計，
係非常難得，所以絕對值得嘉許佢。

好啦，故事嚟到呢度，到底之後會發生咩事，
我唔知，但係我想喺度同銅鑼灣嘅Tasha講一聲：

「多謝你！」

各位網友，如果你都會買Armani嘅化妝品，
記得落去銅鑼灣SOGO搵佢啦，佢真係好好嘅！