陳自瑤首度廣州開騷感觸爆喊 與姚子羚合體激活《四葉草》畫面
.
陳自瑤（Yoyo）呢日殺上廣州，舉行人生第一個音樂見面會，唔少粉絲專程從唔同地方撲去支持，場面墟冚！為咗唔想令粉絲失望，Yoyo開騷前仲特登苦練歌藝，結果出到嚟真係超乎預期，又演得又唱得，台下反應勁熱烈！

好姊妹姚子羚（Elaine）都專登現身撐場，兩個企埋一嗰陣，即時勾起唔少人嘅青春回憶——原來佢哋就係當年《四葉草》系列嘅女主角！一個第一代、一個第二代，眨吓眼已經相隔廿幾年，但兩個人合體完全冇歲月痕跡，仲一齊合唱《談情說愛》，盡顯姊妹情深。子羚仲喺台上分享舞台經驗，幫Yoyo壯膽，Yoyo就話子羚係佢第一個觀眾，又陪練歌又俾意見，真係冇得頂！

演唱會上，Yoyo仲出土咗一大疊黑圖——包括25年前嘅包包面舊照，仲有成個童年成長片段，由細路女到做人阿媽，Keep住咁青春可人，睇到全場嘩聲四起。

成晚騷有笑有淚，最催淚嘅一幕，莫過於粉絲偷偷整咗條應援片，剪低咗唔少祝福同告白，Yoyo事前完全唔知，一睇到即場感觸爆喊！佢話：「佢哋事先冇同我講，中間突然插條片，入面好多粉絲嘅祝福同愛，仲有佢哋點解會鍾意我……嗰吓真係好感動。但當我以為條片播完就完，點知粉絲仲一個一個上台，親自同我講嘢、表達支持，嗰一刻……真係好感動。」

#TVB[超话]#

完騷後Yoyo即時分享感受，話成個人鬆晒：「終於可以放鬆喇，因為籌備咗一段時間，最近幾日特別緊張。今日終於完成，覺得好似放低咗心頭大石咁。」 http://t.cn/AXfUrl2D