孟子義來港宣傳新劇 華麗現身快閃離場 何與爆笑互動粉絲
.
內地人氣小花孟子義同男星何與今日（18日）殺入灣仔會展，現身《香港國際影展2026》，為主演嘅兩部新劇《百花殺》同《一手摘星一手捶地》造勢！兩人一上台就引來唔少粉絲圍觀，氣氛幾熱鬧。

首先出場宣傳嘅係古裝劇《百花殺》，孟子義率先介紹自己角色「沈汐和」，話同以前演過嘅角色好唔同：「呢次個性格更加狠厲，有仇必報，絕對唔會內耗！我演嘅時候真係覺得好爽，相信大家睇嘅時候都會覺得好爽。」而何與就飾演「簫華雍」，外表病殃殃成日攤喺床，但其實心機好重，係個充滿反差感嘅角色。

講到劇集故事由一間小酒館開始，仲引來唔少粉絲去打卡，孟子義就話呢段緣分幾得意：「嗰陣我同佢慶祝佢另一部劇，當時我正喺度睇《百花殺》嘅劇本，就寫咗『百花殺』呢幾個字，包括佢角色名，點知後尾真係合作到，成件事真係好有緣分。」

之後兩人仲喺台上玩起牽紅線遊戲，互動搞笑，何與全程配合，場面輕鬆有趣。孟子義最後再sell劇集，話戲入面有好多佢鍾意嘅元素，角色反差大，希望大家睇完開心減壓，何與即刻搭嘴：「孟姐說得好！」

介紹完《百花殺》，孟子義獨自再上台宣傳另一套古裝劇《一手摘星一手捶地》。佢話當初睇劇本已經覺得好特別，因為劇情有好多意想不到嘅反差，仲加入咗黑色幽默元素，相信自己演繹起嚟會好開心，觀眾都一定會睇得好過癮，仲直言對呢套劇充滿信心！

不過做完宣傳之後，孟子義就快閃走人，未有接受傳媒訪問，認真低調。雖然來去匆匆，但佢一身華麗造型現身，已經成功搶盡焦點！