AI威脅真演員？伍允龍咁睇：人始終鍾意睇真人演出
.
藝人伍允龍、谷祖琳、岑珈其、導演馬偉豪等，今日（18日）去到會展舉行的第30屆香港國際影視展，出席美亞娛樂《光影無極》AI短劇發布會。會上公布美亞經典IP將會重塑，推出多部AI短劇，包括《初戀無限Touch》、《武俠梁祝》、《人皮燈籠》同《新紮師妹》等，陣容相當經典！

伍允龍、谷祖琳同岑珈其今次都各自為AI短片執導，伍允龍負責《武俠梁祝》，谷祖琳就執導愛情短片《初戀無限Touch》，岑珈其就搞《生化壽屍2026》，題材多元，玩味十足。

講到利用AI製作，伍允龍就話：「AI呢樣嘢，有人覺得係機會，亦有人覺得係威脅。我自己就覺得係一種提升。」佢強調：「人始終都係鍾意睇真人演出嘅，AI可以用嚟做啲高難度、真人做唔到嘅動作，輔助到製作。」至於今次《武俠梁祝》會唔會有真人演員？伍允龍透露會由AI演員演出，但幕後就會有動作演員參與，為AI提供動作參考，即係真人做底，AI執相，相輔相成。

谷祖琳就話一直想參與幕後製作，身為兩女之母嘅佢，笑指今次執導愛情短片，正好趁女兒踏入青春期，可以同佢哋傾吓拍拖話題，順便拉近母女距離，認真一舉兩得！岑珈其就話喪屍片現實拍攝投資太大，透過AI就可以天馬行空，想點玩都得，創作空間大好多。

講到《九龍城寨之圍城》近日有傳因中日關係緊張，由吳彥祖頂替木村拓哉，伍允龍就話自己只係演員，冇參與策劃，加上第二輯自己都冇份演，所以真係唔清楚。