馬貫東专访丨入行20年終圓夢 擔正男一自嘲「唔夠靚仔」

藝人馬貫東2006年投身無綫藝訓班，近日終於得償所願，於新劇《臥底嬌娃》以男主角身份上陣。喺新劇入面，馬貫東被張曦雯、陳瀅、羅毓儀幾位女神圍住，佢自爆同張曦雯拍嘴戲嗰陣，竟然因為太緊張而「食螺絲」錫歪咗！

「呢20年過得太快喇！」馬貫東感觸咁話。問到覺得係咪時候做男一，佢話：「係嘅，起碼自己有經驗，有返啲根基，再嚟一個男一嘅試煉，咁心理壓力冇咁大，好多情況都可以處理到。其實啱啱好。」

不過佢坦言，《臥底嬌娃》比之前另一套擔正嘅《死有對証》壓力更大。「上一套係個案為主，每幾集就一個個案，反而要貫穿成套劇嘅部分少啲。但呢套係由一個個體貫通晒25集嘅劇情，難度高好多。」

講到同張曦雯、陳瀅、羅毓儀幾位靚女合作，馬貫東忍唔住笑：「咁多TVB最靚嘅女仔圍住，好開心，好歡樂！」不過佢就爆料，三個女仔其實係一個Party：「佢哋三個好融洽好和諧，我一走過去就覺得好似有啲唔合群咁，哈哈！」

佢話同三位女生嘅感情線各有不同：「頭半段同陳瀅多啲，後半段同Kelly（張曦雯）多啲。其實同佢哋嘅感情線都係開花結唔到果嘅關係，係一種好有默契，大家都明白理解對方嘅關係。」

講到同張曦雯嘅親密戲，馬貫東自爆全靠對方畀信心：「佢話唔使怕，因為要做到場戲好睇，我一定要做主導。」佢仲大爆拍嘴戲嘅蝦碌場面：「我一錫就錫歪咗，錫咗去旁邊！然後佢同我講：『喂，呢度呀，呢度呀！你做咩錫去嗰度？』」佢笑話自己比較少拍呢類場口，成件事真係好尷尬，但好感激拍檔幫手，先唔使NG太多次。

【自嘲唔合格：同其他男主角比算唔靚仔】

雖然升呢男一，但馬貫東對自己要求好高，竟然話自己唔合格！佢解釋：「睇返最初播出嘅頭5集，我已經覺得自己有好多嘢要改，包括聲線、壓場感同氣勢，可以做得再好啲。」問到畀自己幾多分，佢笑住話：「可唔可以唔合格呀？哈哈！」

對於網民話佢未夠男一味道，佢坦言有同感：「喺男一呢個領域，自己仲係新人，要再畀啲時間同經驗去改善。」但佢強調冇因為負評唔開心：「有評語話我唔靚仔，我都有回覆話真係冇辦法，哈哈！比起TVB有做過男一嘅演員嚟講，我算係唔靚仔㗎。」佢話想成為實力派演員，但仲有一大段路要行。

【擇偶條件：又要聰明又要蠢？】

單身三年嘅馬貫東，被問到幾位拍檔有冇佢嘅理想型，佢大讚三人各有特質：「Kelly我鍾意高嘅女仔，仲有佢聰明，真係聰明㗎！陳瀅又會煮飯，佢煮完拎返嚟廠一齊食，好食㗎，唔係吹水㗎！Yuki雖然嘈，但佢有佢可愛之處，有時蠢蠢哋咁。」

咁即係又要聰明又要蠢？佢笑話：「我鍾意平衡少少，唔好太蠢成日畀人呃。」佢仲話擇偶條件一定要孝順、鍾意寵物，至於自己就「鍾意我其次」！

【寵物生意兼顧演藝：寒冬期唔會好耐】

除咗演藝事業，馬貫東近年仲發展寵物美容生意，喺內地開設學校培育人才。提到公司開劇愈嚟愈少影響收入，佢坦言：「係我哋控制唔到嘅事，但都要做好自己先，唔好畀自己有絕望心態。你做好啲，人哋係會睇到嘅，寒冬期我相信唔會好耐。」 http://t.cn/AXfqpKLH