陳志雲否認曾雪藏鄧兆尊 對TVB黃金時段播外購劇感可惜 自爆被蔡少芬請食檸檬
.
陳志雲今日（18日）現身會展，出席開電視節目巡禮，宣布將會主持全新旅遊特輯《雲遊四海》。佢話今次合作係一拍即合，仲提到開電視嘅高層好多都係舊同事，見到佢哋放咗好多心機落去炮製節目，所以有新氣象！

陳志雲透露節目會介紹深度旅遊體驗，仲會搵啲移居海外嘅藝人朋友傾吓計。首站會去英國，因為自己比較熟，喺度生活過幾年又工作過，想同大家分享倫敦精彩嘅一面。佢仲話好想搵1976年香港小姐林良蕙做訪問：「佢好似喺英國，不過難搵啲，但我哋會試吓。當年佢喺利舞台選美，代表香港入咗頭五位，選完之後好多人剪咗佢嘅齊陰頭髮，大家都記得佢好喪好癲、歡喜若狂嘅樣，好深入民心㗎！」

【否認雪藏鄧兆尊：違背我做事的原則】

講到鄧兆尊早前喺節目爆料，話自己因為一句說話得罪咗個「大師」，就被雪藏咗9個月。陳志雲就話：「首先佢冇指名道姓話我，我唔想對號入座。如果當佢係講我，事實係點呢？第一，我冇記得同佢講過嘢，更加唔會話覆機呢樣嘢。第二，我百分之百肯定，我冇講過要雪佢，亦冇安排過雪藏佢，呢樣嘢好違背我自己嘅原則同做事方法。我點會因為一句說笑就去雪一個藝人？藝人係電視台嘅資產，咁做係同公司倒米。」

佢坦言印象中真係冇同鄧兆尊傾過偈，就算有都可能只係見到面打個招呼。至於任內有冇雪過人？陳志雲就話：「我喺任期間冇決定過去雪任何人。咁有冇人雪人呢？有嘅，但唔係我決定，有時都唔需要問我。以前有個演藝界前同事，成日話佢得罪咗我，就踢佢離開公司，唔俾佢做節目。其實佢唔係得罪我，而係得罪公司個老闆。好似係講咗唔吉利嘅說話，定係取笑咗老闆，老闆級嘅人知道之後唔開心，就話呢個人唔用得。」佢透露呢個係男藝人，不過最近已經冇再提。

【對TVB黃金時間播外購劇感可惜】

講到TVB近期嘅情況，陳志雲話自己冇睇TVB好耐，但間中轉到見到黃金時間播多咗外購劇，感覺有啲可惜。「同我哋以前嘅取向好唔同，以前外購劇係為輔，自家製作為主。你擺一套外購劇去黃金檔期，製作部會有好大阻力，特別是而家仲係董事嘅曾勵珍，會發晒惡㗎！但而家嘅取態唔同咗，我明白嘅，因為買劇返嚟平過自己製作好多。但你就少咗一樣嘢，就係反映唔到足夠嘅本地文化。」

佢話TVB劇集以前好有影響力，馬來西亞好多人識講廣東話都係因為睇TVB。「如果製作少咗，影響力自然會細。但要做到一部劇本地受歡迎又可以衝出本地，其實唔容易，因為我哋市場好細。好似當年《男親女愛》喺本地好勁，但去到出埠嘅時候就唔係咁成功，因為人哋唔知你笑咩。」

【自爆被蔡少芬請食檸檬：我食得幾大】

陳志雲2020年開咗自己嘅YouTube頻道，問到有冇邀請唔到嘅嘉賓，佢就自爆被蔡少芬請食檸檬！「有個朋友喺石門開咗間咖啡室，成日見到蔡少芬帶小朋友去學嘢，有時見到張晉。佢話你訪問蔡少芬吖，我話好呀好呀。點知同佢經理人約，經理人話佢哋夫妻喺內地比較忙，得閒先。我話唔緊要。然後我朋友問約到未，我話人哋喺內地有工作。朋友話：『我今日先見到佢落嚟食嘢喎！』仲話：『蔡少芬唔敢俾你訪問呀？』」

陳志雲笑言唔知點解俾人咁嘅印象：「其實我唔係㗎，我哋好脆弱好approachable㗎！Ada，唔使怕，我哋傾吓偈啫！」佢話拒絕當然有，仲話：「佢畀我檸檬，我食得幾大，仲要俾朋友笑我，話人哋怕咗你！」最後佢公開呼籲：「蔡少芬快啲嚟啦！我都一把年紀，仲撩你啲倉巴咩？大家分享吓生活啫！」 http://t.cn/AXft8Qsf