【专访】从警察到男团！黃智賢入行35年剖白心路歷程：最擔心係冇人搵你拍戲
.
藝人黃智賢（Ben）於80年代加入無綫電視，早期參與兒童節目《閃電傳真機》第一代主持，1995至1999年拍攝《真情》飾演容姨養子、張慧儀之老公容向海（阿海）一角，令觀眾留下深刻印象，近年更與藝人李思捷、 麥長青、曹永廉、唐文龍組男團《Hey Brother》！黃智賢话，最開心係聽到觀眾同我講：「我細個就睇你大㗎！」

【為追夢放棄高薪厚職 月薪3,700照入TVB】
黃智賢回想當年去面試「青少年大使」嘅時候，被問到點解嚟TVB，呢個問題令佢回想返自己嘅初心。「我真係回想自己嘅初心，我嘅初心係想做演員，但一直冇同人講，收收埋埋，連屋企人都唔知。」
不過當時面對一個難題，就係本身做警察已經有穩定收入。「嗰時我二十歲二十二歲，突然話唔做，我點樣俾家用呢？呢個係我最大嘅考慮。我記得TVB加埋雜項係3,700蚊一個月，警察係4,800，相差1,100蚊。」
入到TVB之後，佢話家用一樣冇變：「我覺得我盡咗責任，你唔好理我幾辛苦，我洗少啲，捱麵包都好，我好似滿足到自己嘅夢想，所以就入咗TVB。」

【兒童節目學笑：譚玉瑛話我咁惡嚇走細路仔】
做咗一年幾青少年大使之後，黃智賢轉去做兒童節目，呢個時候要突破自己過往嘅框框。「我做警察慣咗受紀律，係比較嚴肅嘅。初初做兒童節目的時候，我係唔敢笑，好容易就唔笑，一唔笑人哋就話我好惡。」
佢笑言當時譚玉瑛直接同佢講：「你咁惡，我唔明點解監製會請你，嚇走晒所有小朋友！」就係咁樣被「兇」，佢開始學點樣笑、點樣親切。「以前做警察就係攞身份證、越酷越好、冇咁多感情。但兒童節目唔可以同小朋友咁樣，會嚇到佢喊，你要重新去學寬容、學笑、學親切。」

【阿海、Ben哥哥、辣薑：每個稱呼都係歷史一部分】
從影多年，黃智賢有好多唔同嘅稱呼，每個都代表一個年代。「尋日都仲有人叫我阿海，真㗎！不過你會睇到，唔同年紀嘅人認識你，有唔同嘅切入點。細個睇兒童節目大嘅會叫你Ben哥哥，睇《真情》嘅會叫你阿海。就算知道我姓黃，都鍾意叫我阿海，因為睇咗咁多年，入晒腦。」
佢話最開心係聽到四十幾歲五十歲嘅男人話：「我細個睇你㗎！」因為從對方叫佢乜嘢，就會知道認識嘅切入點喺邊。「Ben哥哥係一個年代，阿海係一個年代，有人叫我辣薑又係一個年代，全部都係自己歷史嘅一部分，開心㗎！」

【《四個女仔三個BAR》帶使命感：用案件探討社會問題】
講到最喜歡嘅角色，黃智賢話係《四個女仔三個BAR》嘅范志毅。「點解咁講呢？以前拍劇偏向娛樂多啲，但呢套劇好多案件取材自真實事件，而我咁啱又知道呢啲事件。編劇同我講，呢宗案件其實係借鏡邊單案件，靈感嚟自邊度。」
佢話就算自己嘅角色都有一個創作對象：「有個真實嘅律師做原型，開拍前介紹我認識。其實你個角色係跟呢個律師去寫嘅。」佢覺得呢個系列好好，用案件探討社會問題，令佢覺得演出帶住一份使命，去反映一啲事件。

【組男團出歌：唱自己嘅歌感動完全唔同】
近年黃智賢仲搞咗個新搞作，就係同四個大男孩組成男團出歌！「以前登台只係唱人哋嘅歌，應酬三首歌或者一個鐘頭演出。到𠵱家自己組團出自己嘅歌，一年內出三首歌，喺𠵱家個市嚟講算係唔錯㗎啦！」
佢話唱自己嘅歌滿足感完全唔同：「首歌完全代表咗我哋Hey Brother！由點樣孕育首歌開始，作曲、填詞、編曲、搵人、發行、拍MV、構思故事，成個過程由零開始學，好有趣味。出到嚟演出的時候，我覺得好感動，以前冇試過呢種感覺。」

【演員最擔心冇人搵：曾經懷疑電話壞咗】
喺呢行三十幾年，黃智賢坦言演員最大嘅難關就係被動。「樽頸位係你會好擔心冇人搵你拍戲，好被動，心情會上上落落。有人搵就開心，冇人搵就開始懷疑自己係咪唔夠好。」
佢話每個演員都經歷過呢種心情：「曾經有段時間，電話唔響，你會諗係咪自己電話壞咗，點解冇人搵我㗎？」不過𠵱家佢已經學懂另一種自處：「你關一扇門會開另一隻窗。𠵱家活在當下，唔拍劇就做其他事，令自己同樣充實。」
（完）

從警察到演員，從兒童節目主持到男團成員，黃智賢用三十幾年時間證明，只要有夢想、肯堅持，人生每個階段都可以有新嘗試、新突破！
#TVB[超话]# http://t.cn/AXftuMkf