陳山聰专访丨新戲由十幾歲演到八十歲 預告原班人馬明年再攻馬來西亞賀歲檔
.
陳山聰出席其主演的電影《福中時光印記》首映礼。接受訪問，佢透露今次接拍嘅最大原因，係因為導演Johnson Sir係佢嘅戲劇老師：「佢十幾年前開始教我方法演技，對我演藝事業意義好重大，我能夠攞到幾個獎，佢功不可沒。」佢仲話前年《新聞女王》最後兩集客串嘅幾場戲，Johnson Sir全程喺旁邊睇住佢演：「嗰個角色好難演，演得差可以好壞，我又唔想影響到阿佘，嗰年又啱啱攞完視帝，更加想做好件事。結果個角色令到我搵返演戲嘅初心，好開心。」

今次呢個角色對陳山聰嚟講更加特別，因為要由十幾歲演到差唔多八十歲：「講我由福建坐船落嚟香港投靠親戚，諗住有工開，點知親戚走咗佬。誤打誤撞去咗福建中學，由做社工開始，後尾變成老師。因為班學生嘅團結同對學校嘅熱誠打動咗我，令我一直為福建中學出一分力，一做就做咗幾十年。」

陳山聰話角色完全冇參考任何原型，全靠自己同Johnson Sir一齊設計：「校董、校長佢哋想將件事立體化，俾觀眾同福建人睇到佢哋喺香港辦學嘅辛酸。由走鬼、慢慢有自己校舍、得到政府支持，經歷過停辦又搞返，直到今日仲有好多福建中學。我覺得一個商會為咗香港、為咗學生出咁大力，件事好有意義，所以阿Sir一問我，我二話不說就應承咗。」

佢仲話呢套戲嘅製作規模唔細：「唔係幾十萬拍到嗰啲，係大預算。而且首映係佢哋自己搞嘅，唔係為賺錢，全部俾福建商會自己睇同包場。喺呢個時勢仲肯掟錢出嚟為商會建校100週年拍電影，我覺得好感動。」

講到要演八十歲嘅老角，陳山聰話要化老妝、頭髮白晒，但最遺憾係自己唔係福建人：「我講唔到太多福建話，有搵微微幫手教幾句，現場都有福建人演員，我即刻請教佢哋。為免講得唔似，我寧願講廣東話算，有幾句應付到就得。」

佢話拍攝過程中有好多感動位：「尤其係結尾嗰場戲，講我多謝當年投靠福建中學時嘅阿Sir，嗰番說話喺台上講出嚟，我自己都好感動。」陳山聰仲話有將老妝造型影俾太太睇：「佢見到我好多唔同角色，𠵱家佢好叻，年初一帶佢睇我套戲，我問佢好唔好睇，佢話一半好笑一半唔好笑，問我做得點樣，佢話『OK』。呢個評價對我嚟講已經好高，平時佢唔睇我演戲㗎！」

佢透露今次戲入面九成演員都係業餘，從來冇演出經驗：「同佢哋演戲好有趣，大家好有熱誠。我同導演、攝影師三個要現場夾，睇下點樣調整會好啲，希望出嚟件事好睇。」

講到今年嘅工作計劃，陳山聰話去年賀歲片成績好好，𠵱家已經籌備緊明年嘅賀歲片：「我哋三個一定原班人馬，可能會再加人，劇本已經有概念，投資方都傾好晒，𠵱家積極籌備中，7、8月最遲就要開工。」

佢回憶第一次參與馬來西亞賀歲片宣傳嘅經歷：「好刺激！喺香港可能一星期去一次商場宣傳，喺嗰邊係打仗咁，我同Bob、維穩每日回覆晒所有訊息，希望佢哋幫手宣傳多啲。今年競爭好強，有成龍大哥嘅《紅毛計劃》、有《夜王》、有林德榮大哥嘅《娘婆婆》，仲有新加坡上年票房冠軍《寄生下流》。我哋要插隻腳過去分一杯羹，真係唔容易。」

最後票房差唔多有1000萬港元，陳山聰話：「每日去搜尋100萬，過幾日200萬、250、300，去到400萬已經好緊張。我哋幕後團隊知道大概個pool係咁大，五套對手太強，我哋能夠排到第六位已經好幸運。」對於之前嘅排片風波，佢就話：「其實唔係排片意見，係因為我哋呢套唔係大製作，信心冇咁大，所以院線俾嘅場次都唔多。但我哋一路打上去，佢哋就一路幫我哋開多啲院。第一次參與電影宣傳同幕後製作，先知有咁多巧妙嘢，經過今次之後，明年會吸取經驗，希望可以再好啲。」
#TVB[超话]# http://t.cn/AXf60rs5