佘詩曼率《正義女神》演員惠州造勢 陳煒拍床戲向老公備案：佢嫌我畫面太少
.
TVB新剧《正義女神》今晚在惠州舉行見面會，佘詩曼聯同陳煒、周嘉洛、馬貫東、戴祖儀、蔣祖曼齊現身一個廣場。

對於劇集在内地首播獲網民讚「阿佘出品，必有佳品」，阿佘就謙虛話：「唔可以咁講，成個團隊都做得好好，所有演員、劇本、監製、導演都有份，唔可以只講一個人。」對於被指帶旺TVB廣告收益，阿佘直言感受到招商能力的肯定，感謝觀眾支持，並表示自己已盡力而為。

劇中有唔少激烈嘅吵架場面，阿佘同陳煒透露其中一場兩人各持己見嘅對罵戲，原來係現場度出嚟：「劇本唔係咁寫，我哋現場覺得呢個氣氛好，所以出嚟效果應該唔錯。」阿佘話因為未等對方講完，自己已經有立場要表達，陳煒就話角色永遠都係企喺自己立場發言，總監製鍾澍佳都肯俾佢哋自由發揮，豐富劇本。

講到陳煒今次喺劇中有一場床戲，監製鍾澍佳問佢想揀邊個男對手，佢提議用古天祥：「因為上一套《巨塔之後》佢做我助手，大家比較相熟，私底下已經認識咗廿幾年，之前喺友台拍情人節Promo已經有床戲，所以今次就一次過搵返佢。」佢仲話拍之前有向老公備案，連戲入面嘅girdle都係自己買：「怕會走光嘛，自己買穩陣啲。」問到老公反應，陳煒笑住話：「佢反對呀，話咁少就咩啫？佢嫌我畫面太少，我話夠喇，點到即止。」

劇中仲有一位年輕演員劉倬昕反串飾演陳煒個仔，演技獲網民激讚，阿佘都話佢做得好：「要反串已經有難度，加上佢角色好複雜，要放好多自己嘅嘢入去，佢好緊張自己表現，我同佢講記住呢個感受。」

講到已故拍檔許紹雄，阿佘話拍嘅時候好開心，見到另一個唔同嘅「老竇」：「睇片嘅時候當然會諗起當時拍嘅情形，都會好掛住佢，我哋好好宣傳呢套戲，希望多啲人睇到佢嘅作品。」

戲外嘅阿佘最近都有件趣事，佢話新年同吳君如、MIRROR成員肥仔、Edan等打麻雀，結果輸咗二百幾蚊：「辛辛苦苦賺返嚟嘅錢，一鋪清袋！肥仔話一鋪清你袋，真係氣死我。」佢笑住話自己要开工早走冇得上訴，而贏佢嘅竟然係肥仔，Edan只係幫手「食糊」。

另外，陳煒早前被街坊捕獲素顏靚樣，佢話當日係公司春茗後喺停車場搵唔到老公嘅車，打電話問老公，點知俾人影到仲用慢動作處理，搞到件衫飄飄吓，佢笑住話：「好多謝網民影得咁靚。」#TVB[超话]# http://t.cn/AXfS44D2