林俊其勁慳家儲老婆本 承諾5年內娶羅毓儀
.
有「翻版王浩信」之稱嘅林俊其（Kris），因為參加無綫戀愛真人騷《女神配對計劃》，成功撻着暗戀多年嘅羅毓儀（Yuki），呢對情侶人氣急升，拍拖短短半年已經互見家長，認定對方係另一半。近日Yuki喺熱播劇《臥底嬌娃》入面同涂毓麟及吳子冲有親熱戲，搞到Kris醋意大發，佢仲對外承諾5年內會娶女方，為咗盡快兌現諾言，佢積極開源節流，努力儲老婆本，誓要將Yuki「私有化」！

29歲嘅Kris同Yuki拍拖約半年，但關係進展神速，已經互見家長融入對方家庭。Yuki大讚「未來奶奶」廚藝了得，Kris就話媽媽對女友特別好：「第一次見媽媽咁主動夾勁多餸俾Yuki，本來個碗冇乜嘢，一望過去，嘩！繼續夾，我話得嘞，夾俾我啦！」而Yuki就話父母對男友冇特別評價，最緊要佢開心，不過Kris就透露同「未來外父」好啱傾：「你知男人好鍾意講舊時，佢講完舊時之後，我都講舊時，兩個長氣男人不斷講、講、講。」

兩人已經視對方為結婚對象，早前情人節訪問中仲透露下一步想先同居後結婚。Yuki口快快話曾經喺男友屋企打機過夜，Kris都話想有個屬於自己嘅舒服地方先，仲定下目標希望5年內結婚。講到Yuki喺《臥底嬌娃》入面同涂毓麟有咀戲，雖然拍攝時兩人未相戀，但Kris睇完都忍唔住呷醋大叫「唔好」！

為咗盡快將Yuki「私有化」，Kris話將來唔使女友入廚房，自己一力承擔煮飯同洗碗：「以後等我做，我唔想見到佢辛苦。」佢亦坐言起行努力儲老婆本，一方面開源，喺旺角開咗間手搖茶店，又積極敲各大節目監製門路爭取演出機會，唔再呆坐等工開。商務活動上仲會主動向客戶介紹自己，提升個人形象。上個月佢仲孖住女友去廣州音樂會獻唱，開拓內地市場之餘又解鎖唱歌技能。

節流方面，Kris就慳得就慳，唔去「無謂」應酬，減少外出娛樂，寧願留家打機煲劇，出街都係window shopping減省使費。日前本刊捕獲佢返電視城開工都係坐巴士，一個人坐喺下層狂碌手機，疑似睇女友社交平台仲睇到會心微笑，發現有乘客留意即戴番口罩，愛得咁癡纏，難怪佢想快啲將Yuki變成林太喇！
#TVB[超话]# http://t.cn/AXf0mMFV