《中年好聲音4》「黑白榮耀換位賽」羅天宇緊張失準 陳懿德低調撐場勁陶醉 黃藝輝自High甩Beat遭淘汰
.
《中年好聲音4》3月22日晚播出「黑白榮耀換位賽」，30強選手根據往績排名，分成上弦黑隊及下弦白隊進行一對一PK賽，力爭24個晉級名額。打頭陣對戰嘅係下弦羅天宇《傾城》與上弦鄭仲豪《Lose Control》。天宇繼續擅長嘅「女歌男唱」，但因太過緊張，縱使緋聞女友陳懿德（德德）繼續低調到場為佢打氣，亦未能發揮應有水準，結果奪82分，跌入危險區；鄭仲豪則突破自己，奪得全晚最高93分，成功晉級。

天宇賽前受訪時坦言今次係首次除下「獅子王」面具嘅個人演出，所以心好亂，感覺赤裸。比賽期間，坐喺觀眾席上嘅德德專心傾聽天宇唱歌，縱使佢戴上口罩，觀其眼神亦知佢聽得非常陶醉。天宇唱畢表示《傾城》係自己之前主演劇集《婚後事》嘅主題曲，希望令觀眾勾起佢拍此劇嘅回憶。不過海兒表示睇得出天宇好緊張，唱歌時經常縮膊：「同埋我睇到你隻腳冇乜前後，同埋你嘅Distance係比較近，已經近過你嘅肩距，喺下身重心咁窄嘅時候，左右搖擺用咗好多肌肉去平衡，導致全身過於緊繃影響氣息。」肥媽則指天宇天生靚聲，但可惜佢融入太多技巧：「做多咗！」

至於仲豪捨棄擅長嘅搖滾歌，選唱騷靈曲風《Lose Control》，佢略帶沙啞充滿激情嘅歌聲，完美演繹歌中嘅瘋狂感覺，成功俘虜評審們勇奪93分。肥媽指仲豪行正大運，因呢集首次有樂隊現場演奏：「因為呢隻歌同Live Band一齊唱係好緊要，你唱歌同Live Band係唔使睇，係Feel！」周國豐話：「我最鍾意你唱『Control』呢個字，首歌叫《Lose Control》，但你冇Lose到，而且呈現到好多個版本『Control』出嚟。」

至於一直被評審們認為表現不穩定嘅下弦黃藝輝，決戰上弦「大魔王」唯一，兩人演出實力懸殊。藝輝以王力宏嘅輕快歌《我們的歌》出戰，惟中段佢嚴重甩Beat，就算谷婭溦焦急咁為佢打拍子亦無補於事，最終僅得78分。谷婭溦指藝輝唱歌早段已搶拍子：「依家係你自己好High好開心，但成件事錯晒！」周國豐則指《我們的歌》充滿正能量，但藝輝嘅聲音予人「攰」嘅感覺。海兒坦言要為藝輝攞低分負上責任，因佢曾在海選聽過藝輝自彈自唱輕快歌，覺得不錯，所以才建議佢選唱輕快歌。

之後唯一出場唱《You Raise Me Up》，甫開聲已眼泛淚光，佢真誠演出感動全場。肥媽指《You Raise Me Up》對唯一毫無難度，好驚喜佢注入濃濃嘅感情嚟唱。周國豐與谷婭溦都讚唯一減咗好多技巧，純以感情推動歌曲，谷婭溦話：「證明你有聽到我哋講嘅所有嘢，值得大家學習。」

整個回合結束後，上弦黑隊鄭仲豪、許美琪、卓猷燕、馬浩宜、唯一全部晉級，評審們要在下弦白隊羅天宇、錢偉浩、蔡文駒、鄭家聲、黃藝輝當中淘汰兩人，最終選咗藝輝同文駒。有「中4劉以達」之稱嘅藝輝得知自己係《中4》第30名，不忘搞笑扮拎住獎座話：「係咪應該有個獎喺度？幫我P落去吖唔該。」瞬間緩和悲傷氣氛。藝輝感激《中4》所有台前幕後，因為大家都好有愛：「我會更加認真做人、做音樂。」文駒則稱參賽最大意義係挑戰自己，以及認識一班好朋友。車婉婉讚文駒係「Giver」（付出者）：「佢從來都係想伸手幫人，呢個正正係《中年好聲音》嘅精神。」

#TVB[超话]#