《臥底嬌娃》李海銅大結局慘死內幕曝光 親爆杜燕歌暖心舉動：佢真係好細心
.
《臥底嬌娃》今晚（27日）大結局，蘇嘉盈（李海銅飾）嘅死因真相曝光，原來係權世豪（杜燕歌飾）害死嘉盈。

劇情講到奕風（馬貫東飾）喺佳琪（張曦雯飾）協助下，終於搵到嘉盈死前留下嘅錄音頸鍊。事發當日嘉盈留低喺辦公室搵證據時遇到世豪，對方懷疑嘉盈同粉精靈一事有關，不停質問佢邊個係其老闆。最終世豪追到佢上天台，唔止對嘉盈拳打腳踢，仲捏住佢條頸，逼佢食大量粉精靈，佢最終因為吸食過多粉精靈，搞到意識模糊、行路唔穩，但仍然保護住奕風，「我老細叫我埋潘奕風身攞你料呀，但個傻仔佢咩都唔同我講，我唔明點解佢要對你咁忠心」講講下更不慎喺天台跌咗落去。

李海銅接受訪問時談到拍攝呢場戲，因為佢係新人，初時都十分緊張，「我好擔心去到現場做唔到導演要我哋做嘅嘢，驚要NG累到其他人，但去到現場佢哋畀到一個好安全嘅環境我，又會以演員為先，畀時間我慢慢培養情緒，所以好感激導演同成班幕後人員嘅幫忙。」

佢大讚對手杜燕歌係十分好嘅前輩，大爆其窩心舉動，「佢一早剪好晒啲指甲，同埋本身佢個角色會戴好多飾物，好似戒指、銀器，但因為佢知會有呢場同我嘅動作戲，驚會整傷我，加上又諗到連戲嘅問題，所以佢喺前幾場就冇戴啲飾物，燕哥真係好細心。」

李海銅又話拍攝前已同杜燕歌傾好，為求效果逼真，所有動作都唔借位，「燕哥嘅力全部都啱啱好，唔會令你覺得有痛嘅感覺，但出嚟畫面又好真，佢真係好勁。同埋佢仲即場示範，教我吸食咗毒品之後個反應點樣可以做得更好，仲分享咗好多細節位嘅嘢，真係令我獲益良多。」

一班觀眾都睇得好入戲，紛紛表示「原來嘉盈係咁死」、「權世豪好衰」、「嘉盈新人嚟講做得好好，睇好佢拎飛躍」。#TVB[超话]#