歐瑞偉專訪｜慨嘆武師搵命博 溺水1分鐘與死神擦肩 目擊同門跳樓失手致半身不遂
.
TVB網絡系列《電視城內》請嚟歐瑞偉做嘉賓，同大家講吓佢嘅電視故事。歐瑞偉嘅電視故事，就要由細個玩自由體操講起。佢話當年阿媽帶佢去小學報到，見到啲哥哥姐姐喺度玩體操：「嗰時我仲細，佢哋喺我面前飛嚟飛去，一個魚躍就翻到張墊上面，嘩！好有型呀！嗰時先知呢樣嘢叫體操。」歐瑞偉四年級考入學校體操隊，中一成為校隊參加學界比賽，佢話成績都還可以，但每次都係攞第三名，同冠亞軍無緣。雖然有運動細胞，但佢從來冇諗過會入行。

講到入娛樂圈，全靠自細認識嘅朋友李耀敬。歐瑞偉話：「佢以前都係TVB藝員，依家喺內地拍好多電視劇，我哋自細就識，12歲就兩個人去酒樓賣點心，嗰時唔係推點心車，而係孭住個大鐵盤叫賣，啲蝦餃、燒賣、點心籠堆到好高，幾乎遮住自己！」後來歐瑞偉喺荷蘭住咗一年半，返香港之後再遇李耀敬，對方叫佢試吓考邵氏訓練班。

歐瑞偉拎咗報名表格去考邵氏訓練班，面試嗰陣劉家良負責，第一句就問佢：「你識乜嘢呀？」歐瑞偉話：「啊，我乜都唔識，但我有玩體操。」劉家良就叫佢打兩個筋斗睇吓，歐瑞偉照做，劉家良再問：「唸一段台詞聽吓，國語。」歐瑞偉話唔識國語，劉家良就叫佢講廣東話，佢講到窒吓窒吓，之後叫佢返去等消息，冇幾耐就收到取錄信，入咗邵氏第五期武術演員訓練班，同期有郭政鴻、黎燕珊、邵卓堯同李文彪等人。

歐瑞偉話做武師付出嘅代價係危險性大：「薪金高但你會受傷，然後養傷期間已經要用之前賺落嘅，賺到都唔夠睇醫生，得個桔。你冇事，咁就好，但如果有事，又點算呢？」佢話作為武師出身嘅演員，起碼安全性自己可以估計到，錢方面，自己嗰時仲後生，冇諗過錢呢樣嘢，好玩比錢重要。

武師收入雖然較高，但歐瑞偉話如果不停做，自然連使錢嘅時間都冇，仲增加受傷機會。佢提到以前邵氏有一位師兄，曾經賺好多，可能啱啱結婚想再賺多啲，嗰日要拍佢從二樓跳落嚟，之前佢已經因為拍爆炸戲燒傷皮膚，隔咗十幾日就嚟開工。嗰日落雨，鋪喺下面嘅紙皮盒全部淋濕，要用帆布遮住，就喺佢跳出去嗰一刻，因為個位睇唔到，加上之前有傷要就住，一飛出去，點知唔小心挫到條頸，從此半身不遂，到今時今日仲坐喺輪椅上。歐瑞偉感慨：「其實做武師，冇事就冇事，有事真係唔識講，全部係搵命博，但點解仍然有咁多人做武師？就係一個理念，武師好奇怪，年輕時衝動自我，被人問你得唔得時，你就一定同自己講我一定做到，當然係喺合理嘅環境下，咁難嘅動作都做到，會覺得好開心，我做到就更加覺得自己係超人，勝人一籌。」

歐瑞偉話做武師嘅時間唔長，高峰期試過一個月賺三萬蚊：「試過一次，因為太多嘢要拍，有時有雙工，如果要落水就工半，每組都替，啱啱嗰個月有3萬蚊，其實正常係萬幾兩萬，表面係好可觀，但你諗吓，如果受傷就可能要坐一頭半個月甚至幾個月，完全冇收入。」歐瑞偉比較好彩，受嘅傷都唔係好嚴重，只係拗柴、撞傷、屈親或者成塊面腫，骨折、斷骨都未試過。

不過做武師呢個職業，令歐瑞偉學識唔怕辛苦、唔怕痛，盡量忍，耐性比一般人強，就算受傷都忍住做完個動作：「我唔可以令武術指導覺得唔得，唔得多兩次，下次就冇得做，唔得就換第二個，你可以返屋企瞓覺。所以我哋嘅集中力要好高，要清楚做嘅每一個動作，令自己唔會受傷。因為嗰個傷少則可能係休息十幾日，多則要一年半載。」

做武師嘅時間雖然唔長，但歐瑞偉有一次同死神交手嘅難忘時刻。嗰次佢拍飛虎隊做替身，喺上遊艇前會將佢送到一艘貨船上。一班替身跳落水，上面有人將繩掟出去，飛虎隊自己游上船，拍咗幾個鏡頭，意外就出現咗：「我唔為意自己隻腳俾條繩繞住咗，開機之後開船，一拉我就喺水下面，我惟有出盡力想拉嗰條繩，但水壓太大，水流太急，根本做唔到，當時有8個飛虎隊，我係其中一個，亦唔知道其他人有冇睇到，真係唔知道過咗幾耐，45秒？1分鐘？感覺好耐，我喺水底不停飲水，望住水上嘅陽光，我開始放棄，因為冇力，奇怪嘅係，畫面回到小時候，一幕一幕咁，見到爸爸媽媽、所有家人，每一件自己認為重要嘅事喺畫面中出現。之後有人救咗我上去，不停吐水，休息過後，食完飯我又再拍，當時我唔覺得恐怖，因為已經放棄，冇晒氣力，嗰段時間我同死亡最接近，即使拍跳樓戲，都未經歷過呢種恐懼。」

對於生死，歐瑞偉話：「你問我懼怕死亡？隨住近年身邊唔少朋友離開咗，細個會驚，但依家已經接受，死亡係遲早嘅事，即使一百歲都係會死亡，倒不如趁依家呢段時間好好享受，做自己覺得開心嘅事！」

#TVB[超话]# http://t.cn/AXIIY3UA