#谢安琪[超话]#
20260331 谢安琪IG更新
三月，謝謝你帶來的感悟🫂

1a) 1b) 1c) 呢三張相飲咖啡相，我覺得好靚，雖然有兩張已經post咗story，但係我係都要再post一次，fan橋😝

2） 心情好嘅時候飲咖啡，心情唔好嘅時候飲咖啡，同張先生一齊飲咖啡，心情唔好都變成心情好好，心情好好就會變成心情好好好🥰☕️

3） 新年後第一個公開活動，好多謝現場大聲為我歡呼吶喊嘅fans，每次見到你哋，我個心就會定啲，我而家叫你哋做通心粉嘅friend — ＂定心粉＂（ok 👌🏻講笑😂，呢個名好核突I know 😂😂😂)好鍾意呢一張路人視角，影到我傾國傾城咁靚😌😌😌

4） 今年收到好多好啱我用嘅生日禮物，其中一份係我化妝師Kris ❤️❤️送俾我嘅Lip Booster, 係好犀利㗎，一搽即刻靚咗✨

5） 我喺呢間咖啡店遺漏過一支心愛嘅手仔消毒噴霧，因為當時並唔係即日發現，所以冇返轉頭攞返😢搞到我而家每次去幫襯，都好有衝動想問吓店員，有冇執到我嗰支消毒噴霧😝但係其實已經隔咗好耐，而家仲問嘅話真係會好尷尬，會有種懷疑自己係執着到黐線嘅自我質疑，但係我又真係成日都記住，每次諗起都覺得自己好唔啱，冇記性漏低嘢搞到嘥咗支噴霧……我每日有好多時間就係咁樣浪費咗喺呢啲自我內心對話嗰度🙈🙈🙈

6） 呢張係Kakaball寫俾我嘅notes ，佢好乖，成日會幫手做家務，亦都秉承我鍾意抹枱同埋set 餐枱嘅衣鉢，妹妹真係成日都令我好感動🥹

7） 嚟緊呢幾個月，Kakaball 報咗名參加好多舞蹈比賽，亦都第一次同佢嘅好朋友CC一齊參加雙人舞，我都好開心可以跟佢哋一齊去開下眼界，你哋睇吓佢哋個look幾咁有型✨

8） 同張先生拍拖去中環行街街，路過之前拍攝《法與情》嘅其中一個街景，竟然會撞到一齊拍《法與情》嘅拍檔揦鮓，真係有冇咁蹺呀？😂

9）扮吓文青影吓相，其實嗰日真係好熱，我嗰日其實面仔亦好水腫，但係我又好鍾意呢張咁刻意扮不經意嘅相，我真係好騎呢😂

10） 呢個係我好鍾意嘅K字吊墜，人哋原本嘅設計係掛喺頸鏈度嘅，但係我忽發奇想，將佢掛喺耳環嗰度，我覺得又好靚喎，開心🙌🏻🥰

11）生日月收到好多祝福，今年特別深感受，因為由澳洲返嚟之後，太掛住瞻瞻，心情一直灰灰地，但係承接住大家為我慶祝嘅good vibes，我即刻生猛好多💪🏻好多謝天父，賜俾我身邊有咁多美麗嘅人，好心地嘅天使，好多人錫我，為我帶嚟好多歡笑，多謝為我慶祝嘅每一位，同埋send message祝福我嘅所有人，I love you all🥹🙏🏻❤️

12） Choco Luffy 而家每一日，好多時候都會趴喺呢個位置，好似喺度望住，晶晶以前嘅專屬位置咁樣，我自己每一次行過，都會下意識望一望佢喺唔喺度，見到佢唔喺呢個位置，我個心總係會酸一酸

13） 我已經發夢見過晶晶好多次，每次都係好似平日生活嘅片段咁，只係有一次，我喺夢裏面突然醒起，晶晶已經離開咗，令我知道嗰個係夢，但係嗰一刻，我仲望到晶晶喺我面前，我唔捨得夢醒，但係結果都係驚醒咗。然後我行出房，走去客廳去返頭先發夢見到嘅位置，想感受吓晶晶喺唔喺度。但其實晶晶喺唔喺度都好，佢一定知道我好掛住佢。就正如張先生同Kakaball 咁講：每一次我哋諗起晶晶，其實就係我哋又再一次互相connect，只要我哋成日都掛住佢，心入面成日都有佢，佢就永遠都同我哋一齊🫂
我想再多謝你一次啊晶晶，多謝你喺生命裏面，每一日都活得咁開心咁自在，你提醒咗我亦都示範咗俾我睇，活着嘅每一刻都值得慶賀。就算生命嘅軌跡有高有低，我都會好似你咁，笑住去面對，我會加油㗎，多謝你，晶晶❤️

四月，歡迎你到來🫶🏻