林俊其《正義女神》同丘梓謙玩HeHe 幫Yuki篩選黑絲相自稱冇私心
.
TVB劇集《正義女神》近日舉行宣傳活動，劇中飾演「廿四孝男友」嘅林俊其（俊其）接受訪問，大談今次角色突破，仲自爆同丘梓謙有一段耐人尋味嘅「兄弟情」，被網民熱議係咪HeHe關係。佢亦提到幫女友罗毓仪（Yuki）揀黑絲相，笑言自己冇私心，因為了解佢仲多過佢了解自己。

同丘梓謙由敵變友 兄弟情被網民無限解讀

俊其過往多演有錢、招積嘅角色，今次就大翻身：「今次同平時有少少唔同，做一個比較家景貧窮嘅小子，因為有啲原因導致我去犯罪。」佢話角色係少年犯，好彩自己當年廿七歲，同角色年齡相近，唔使刻意扮細：「監製好好搵咗我做『大少年』，其實係做返自己。」

劇中俊其同丘梓謙有段好好嘅兄弟情，因為對方同爸爸不和，走去俊其屋企住，成為「避風塘」。俊其笑言：「呢個兄弟情喺網絡上邊，被網民提出另一個關係，至於係咪呢個關係，就交俾大家再睇啦。」

佢話同丘梓謙本身已經好friend，上一套劇《反黑英雄》兩人係對立關係，仲打到幾乎死，今次就變成老友，反差極大。被問到拍HeHe情節會唔會尷尬，俊其話：「我哋本身都好熟，大家都好玩得。一去到現場傾下偈，好自然就接咗啲對白出嚟，有個好開心嘅氛圍。」講到如果將來有男男親熱戲接唔接受到，佢話：「有得拍梗係好，每一次機會都難得，如果真係一個大挑戰，我都要挑戰自己。」

為咗演活貧窮小子，俊其透露有參考韓劇入面嗰種窮困嘅感覺，亦有鑽研同父親嘅親情戲，希望演得更肉緊。被問到為拍劇可以去到幾盡，佢話：「剃頭？睇下係咪真係需要到呢個程度，如果真係好需要，笠頭套都唔得嘅，咁就真係OK。」

幫Yuki篩選黑絲相 自認最了解佢

俊其同緋聞女友Yuki感情要好，日前Yuki拍攝性感黑絲造型，俊其都有現身接收工，仲幫手揀相。佢笑言：「有少少誇張咗，其實我係幫佢篩選一啲佢最靚嘅角度。因為我覺得我比較了解佢，知道佢邊個角度最靚、邊度突顯到佢僅有嘅女人味。」

佢自認最清楚Yuki邊一面最好睇，仲話：「我了解佢仲多過佢了解自己。」被問到會唔會呷醋佢影得咁性感，俊其就話：「都冇話呷醋嘅，我都想幫吓佢，俾啲意見。」佢仲透露自己都有幫Yuki影相，不過就話：「我影嘅就冇大師影得咁靚，所以留返自己紀念。」
#TVB[超话]# http://t.cn/AXIHJZ0R