《東周刊》丨TVB強收藝人社交帳號 張振朗戴祖儀拒就範 郭柏妍游嘉欣反抗遭雪藏
.

據香港《東周刊》獨家消息，為加強對藝人社交平台嘅管控同風險管理，TVB強制所有人交出個人社交平台帳號同密碼，實行「中央管轄」。呢舉動惹到多位力捧緊嘅小生花旦不滿，甚至唔驚冇工開，都拒絕妥協。據悉，張振朗、戴祖儀、郭柏妍、游嘉欣反抗最激烈，而TVB同呢四大「反抗軍」至今都未傾掂數。

突施辣招
本刊收到獨家消息，TVB近日突然出「辣招」，強制藝人交出Instagram、Facebook、YouTube、小紅書等個人社交平台帳號密碼，目的係實行「中央管轄」，即係由公司統一監管藝人發文內容，而且新條款寫明，藝人完約後一年之內，個帳號仍然由TVB管理。同時亦傳出，如果有藝人拒絕接受，會直接被列入「雪藏」名單，唔會再獲安排工作！

一班小生花旦私下議論紛紛，大多數都表示不滿。知情人士爆料，話TVB今次「辣招」，其實背後有多重商業考慮，亦係無可避免嘅風險管理，唔單止係管制藝人。據悉，除咗配合TVB新成立嘅「藝人創作者網絡」（ACN）之外，亦因為近年社交媒體「手滑」事件不斷，好多藝人一時疏忽，讚好爭議帖文、發表敏感言論，甚至洩露劇集造型，最終搞出公關危機，輕則刪帖道歉，重則影響內地市場。

TVB驚因藝人社交平台嘅個人行為令公司蒙受損失，甚至影響廣告收入，先決定由專業團隊把關，確保所有對外發出嘅訊息都準確得體。另外，完約後帳號由公司管理一年呢條款，主要係防止藝人帶走公司用資源捧出嚟嘅成果。知情人士又透露：「好多經理人公司都有類似嘅冷靜期安排，投資咗咁多錢捧紅你，如果一完約就全部帶走，公司投資咪白費！」

【落選真相】
有人為保飯碗選擇妥協，但亦有上位中嘅小生花旦，為守住最後私隱，寧願冒住被雪藏嘅風險都堅持唔讓步！TVB最新綜藝選秀節目《魔音女團》，就成為推行新規嘅第一個節目。有指入圍16位女藝人全部都交出咗社交平台帳號。不過，憑住甜美樣貌殺入初選嘅郭柏妍同游嘉欣，本來被視為大熱，外界一致睇好佢哋藉住呢個機會組團出道，再衝事業高峰；點知結果出人意表，兩位竟然大熱倒灶被Foul出局。

對於賽果，網民眾說紛紜，有人猜係表現失準，其實真正原因係郭柏妍同游嘉欣一齊「抗旨」，拒絕交出社交帳號密碼。知情人士又透露：「公司覺得既然要捧你，就要全方位包裝，唔可以等你亂出Post影響形象。不過郭柏妍同游嘉欣同公司代表傾完之後，都覺得條件太苛刻，認為社交平台係佢哋花好多心血經營，屬於個人資產，唔想交畀人管理，於是堅持唔簽，結果就算係大熱，最終都冇得再玩《魔音》。」

【兩難抉擇】
本刊明查暗訪得知，「反抗軍」仲有張振朗同戴祖儀。身為視帝嘅張振朗，雖然近排公開活動成日掛住招牌笑容，亦活躍於社交平台，不時同女友楊偲泳放閃互動，又分享操肌成果，大晒麒麟臂震撼網民。不過鏡頭背後，呢位視帝正面對事業上重大抉擇。知情人士直講，張振朗認為社交平台係自己同粉絲直接溝通嘅橋樑，亦係多年用心經營嘅私產：「近排張振朗內地人氣急升，佢個社交平台好值錢，亦係佢心血。佢唔想發文要經審批，甚至同女友互動都被監控，覺得咁樣好假，所以遲遲唔妥協。」縱使張振朗近排仲有大型活動亮相，但據知因為佢一直未答應，手頭幾個內地商演洽談已經暫時擱置。

被稱為「多棲藝人」嘅戴祖儀，除咗拍劇、唱歌之外，近排仲有機會參與旅遊節目《他們的澳洲駕期》，備受力捧；佢亦相當活躍於社交網。有消息指，佢對公司新政策反應好大，認為藝人社交平台唔單止係宣傳工具，更加係展現個人風格嘅平台。知情人士爆料：「戴祖儀一向好有自己諗法，鍾意Post生活入面鬼馬嘅一面。佢覺得自己個Page就係自己小天地，唔想變成公司附屬品，所以雙方而家仲喺度拉鋸。」

呢四位「反抗軍」敢於企硬，全因佢哋有「牙力」。今年31歲嘅戴祖儀，IG有29萬粉絲，因為粉絲多，不時獲品牌邀請合作，亦經常同唔少YouTuber一齊拍搞笑片，收視率相當唔錯。28歲嘅郭柏妍，係2020年港姐季軍兼「A0女神」，IG有25.8萬粉絲，近年憑住熱播劇《下流上車族》人氣急升，廣告代言接唔停，保健產品、醫美、首飾等大品牌都搵過佢。

另一位「A0女神」、26歲嘅游嘉欣，憑住鄰家女孩清新形象，吸納大批年輕粉絲，IG有14.4萬粉絲。至於38歲視帝張振朗，IG粉絲更高達37.2萬，內地人氣亦持續上升，社交平台商業價值極高。藝人究竟寧願失工，定係失私隱？相信真係好艱難嘅抉擇。
#TVB[超话]# http://t.cn/AXM7E4bD