专访丨梁朝偉連拍50次教書戲好大挑戰 嘉玲讚《寂靜的朋友》好睇
.
梁朝偉（Tony）日前與導演伊迪高安怡迪出席電影《寂靜的朋友》首映禮。偉仔喺戲中飾演一位腦神經科學家，為咗角色做足功課，仲自爆拍一場教書戲NG咗50次，覺得好醜怪。講到早前喺韓國宣傳時大派心心，偉仔否認係「被迫營業」，話只要令人開心就冇所謂。太太劉嘉玲已經睇咗套戲，仲大讚好睇。以下係足本訪問內容。
---
0:00 開場
0:07 準備角色：腦神經科學家
2:05 英國口音訓練
2:51 拍教學戲NG50次：自覺好醜
4:01 與樹對戲：獨處自在
5:05 抽離唔到角色：仲睇緊科學書
6:26 與導演合作學到好多嘢
8:13 韓國宣傳派心：否認被迫營業
9:25 未來唔抗拒合作，但想抖吓
10:31 谈觀眾反應：藝術電影有佢嘅觀眾
12:16 導演問題：第一次合作難忘經歷
13:41 導演搬真樹趣事

---
記者： 今次呢就飾演一個腦神經科學家，其實事前有冇一啲準備嘅功夫要做吓㗎？

梁朝偉： 要呀，因為喺戲裏面要喺大學教書，變咗你一定要……如果你唔讀，你演嗰陣時人哋會睇到你眼睛裏面冇信心。我呢個腦神經科學家嘅範疇就係早期認知發展，即係BB個腦點樣發展。導演有提供一啲書，同埋我都去咗唔同大學訪問嗰啲神經科學家，港大、科大……因為納姐（葉玉如校長）都係腦神經科學家，另外一個陳應城教授都係中大研究記憶嘅，用老鼠去研究點解佢哋會識得喺個窿度走出嚟又走返入去，因為佢整咗好多個窿。好多謝佢哋嘅幫忙。同埋香港呢，我哋冇Baby Lab，我聽聞世界上最大嘅Baby Lab係維也納。我好彩，因為香港如果有機會睇到EEG，就係你睇戲裏面我點嗰啲，嗰啲係俾小朋友做嘅，冇咁大輻射。唔係咁容易可以睇到，要有小朋友去醫院做測試你先有機會睇。好彩有啲教授幫我望，又多謝瑪麗醫院同埋佢哋嘅小朋友家屬，因為佢哋全部同意我先可以去睇。亦都多謝一班醫生教我點樣去睇嗰個EEG嘅Graph係點。所以其實做咗好多準備功夫㗎。同埋我有設定個角色係喺英國讀書，即係劍橋或者牛津。我六個月前就請咗個英國人同我一齊去做呢個準備，我希望有一啲英國口音，譬如英國人睇嗰陣時就知道：「啊呢個人梗係喺我哋度讀過書啦。」呢啲其實都係令我進入角色嘅方法嚟嘅。

---

記者： 咁點解要準備咁耐？

梁朝偉： 其實唔使六個月嘅，三個月都得，不過我覺得我希望喺準備嘅時候做到最好，變到我拍攝嘅時候一啲包袱都冇，可以盡情享受拍攝過程。特別係教學嗰場戲，好鬼長㗎。我冇諗過佢拍一個咁長嘅shot，導演拍咗一個master shot好長，拍咗五十次。下面百幾二百個學生喺度，中間我記得有一兩次唔記得咗一行半行字，你又會覺得好醜怪，又覺得：「下，咁多人睇住。」所以都要好專注。嗰場戲係我諗成套戲裏面最挑戰性最高嘅。

記者： 五十次係咪你從影以嚟最多NG嘅？

梁朝偉： 唔係，因為我哋唔係嗰啲荷里活製作，我哋得單機拍攝，要轉好多角度，佢希望cover晒所有角度，所以呢度一個、嗰度一個，做好多次。

---

記者： 今次主要同呢棵樹嘅生命做對手戲，算唔算係一個好難嘅挑戰？

梁朝偉： 我又唔覺喎，因為我好鍾意一個人獨處。所以無論係真正嘅COVID期間，又或者拍戲拍COVID嘅時候，我可以覺得好自在，因為你好似同人之間分隔開咗，同埋冇咗其他distraction。譬如你做閉關，你冇咗電話、冇晒所有嘢，唔准睇書、唔准睇電視，你淨係一個人，你做咩都係全心全意，叫做mindfulness。你食雪糕都全心全意，你會感覺好似拍COVID嗰段時間，進入一個更加深沉嘅awareness同埋consciousness，嗰種意識係更加深沉。

---

記者： 你平時唔知自己諗咁多嘢㗎嘛？

梁朝偉： 平時你唔知㗎，但係當你好靜嘅時候，你個腦原來一分鐘諗咁多嘢。但其實我哋係冇停過嘅，同埋我哋有時好唔aware身邊嘅嘢，因為太多資訊。你食緊飯都喺度諗：「陣間約咗邊個？唔知會唔會遲到呢？」就係咁囉。

記者： 拍完之後對神經科學嘅嘢係咪已經完全忘記晒？

梁朝偉： 又唔係唔記得晒，而係我唔係一個科學人，好少睇科學書。但係而家都仲睇緊，我覺得個問題係我仲未離開嗰個角色，我仲留戀緊嗰個角色。所以我而家一路都睇科學書。需要一啲時間嘅，因為你花咁多時間投入咗去，你真係需要相對長啲嘅時間先可以離開佢。我已經盡量做返自己，走去滑雪、玩，但係都……

記者： 係咪最長時間要離開嘅一次？

梁朝偉： 係呀。你睇你放咗幾長時間去習慣，好似我哋如果夜晚叫你唔好刷牙，你都會好辛苦，因為嗰個習慣太多年。演一個角色都係，如果你習慣咗佢太耐，真係好似王家衛咁，要好長時間先可以走出嚟。

---

記者： 今次同導演合作有啲咩刺激或者得著？

梁朝偉： 我覺得我學識咗好多嘢。除咗腦神經科學，其實我個範疇係早期認知發展，即係小朋友個腦點樣發展，但係我喺戲裏面仲要讀植物學，即係植物嘅智慧，仲要讀啲哲學。所以會令你反思好多嘢，例如你同自然嘅關係、我哋應該點樣分享呢個地球，唔止生物，或者可能同AI，因為AI而家已經開始，你要諗吓將來我哋應該點樣同佢相處。我覺得學識咗好多嘢。導演好好人、好nice，一個好有內涵嘅人，同埋佢個crew好好，演員又好出色。我哋唔係一個好大嘅製作，係一個mini crew，但係我哋好開心，嗰段時間拍攝大家都好開心。

---

記者： 所以你宣傳嘅時候都火力十足去好多地方。

梁朝偉： 火力十足？其實以前王家衛都係去咁多地方㗎啦。尤其是而家電影又唔係咁好，可以做到幾多咪幾多。

記者： 早前去韓國宣傳嘅畫面，網友好鍾意，覺得你好cute，戴咗當地啲帽，又派好多唔同嘅心心。你覺得對於一個I人嚟講係咪一件好難嘅事？

梁朝偉： 都唔係嘅。能夠有機會令人開心，都係一個好事嚟嘅。

記者： 但係網民覺得你係被迫營業喎。

梁朝偉： 被迫營業？都唔可以咁講嘅。我自己平時唔會慣做呢啲，但係你做啲嘢可以令到人開心嘅，咁所謂……冇所謂啦。

記者： 點解網民覺得你好突破，點解你唔笑吓呢？覺得你笑應該好靚仔。

梁朝偉： 我有笑呀！（笑）

---

記者： 會唔會都想同韓國或者其他地方合作？

梁朝偉： 其實我不嬲都冇抗拒同唔同地方嘅人、團隊或者導演合作。你睇我八幾年就開始同侯孝賢、陳英紅、李安合作，又或者無端端跑去拍Marvel，拍完Marvel又拍偶像片。我冇抗拒嘅，我覺得如果有一個合適嘅導演、合適嘅故仔，點解唔做呢？都幾好。

記者： 有冇一啲新嘅劇本打動到你？

梁朝偉： 有好多我睇咗，我唔鍾意，所以冇考慮。但係我自己就已經應承咗一啲朋友要拍一啲嘢，但暫時我唔係好想做嘢住，可能出年先啦，因為我做宣傳做到六月。

---

記者： 歐洲嘅觀眾係咪反應熱烈啲？

梁朝偉： 歐洲嘅觀眾就好似反應熱烈啲。韓國嘅觀眾呢，可能因為成日第一場都係我啲fans搶晒啲飛，唔知係咪因為佢哋太後生，我唔知佢哋係咪真係好理解，可能要睇兩次。如果比較細個、年紀比較細，但係我好相信呢啲藝術電影或者獨立電影，佢有佢嘅觀眾。我成日去油麻地百老匯電影中心睇戲，睇伊朗電影，其實都有人睇㗎，你唔好以為冇人睇。獨立或者非主流嘅電影都有佢嘅觀眾。

記者： 希望香港都有啦。

梁朝偉： 希望香港都應該有，因為我記得以前都有好多放藝術電影嘅戲院，不過後來都關晒啦，灣仔又關咗，而家越嚟越少，淨返油麻地同西環一啲啲。希望……我又覺得唔係話真係去到好……我睇過嗰啲戲，中間我都瞓著咗㗎，但係呢套唔係！呢套好靚㗎！

記者： 嘉玲姐睇咗未？

梁朝偉： 睇咗喇！佢話：「嘩，好睇！」希望大家觀眾都係咁覺得。

---

記者： 不如問吓導演問題。今次第一次同導演合作，有冇啲難忘嘅經歷可以分享？

梁朝偉： 我好難忘。因為之前我接呢一部電影嘅時候，我未認識佢，開始睇佢嘅電影，一睇就好鍾意，覺得雖然嗰時未認識佢本人，但係佢嘅電影總之我好鍾意，我覺得一定要同呢個人合作。直至到我再同佢做第一次視像會議嘅時候，我通常都係咁㗎，我會揀導演先，因為同一個劇本交俾唔同嘅人，會有唔同嘅interpretation。我好欣賞佢作為一個導演，同佢傾計嘅時候我覺得佢好有內涵、好謙虛，但係好有自信，佢好知道自己做緊咩。我覺得我可以同佢一齊合作。結果最後喺拍攝期間，的確係非常之愉快。我哋拍咗大概總共係九十一天左右，過程好愉快，同埋好有啟發性。

---

記者： 我相信吸引力法則，你都係一個好謙卑、好有內涵嘅人嚟嘅。

梁朝偉： 我唔係嘛？

記者： 你唔係？我聽聞導演好認真㗎，我睇上網講……

梁朝偉： （笑）係。

記者： 佢認真到搬咗棵真樹去現場同你對戲喎。

梁朝偉： 其實唔係，我哋係cheat㗎。因為主要個景係喺德國一個大學嘅古時候花園，大學宿舍嘅中間，嗰棵係棉棱樹，好少。導演搵到嗰棵樹係喺匈牙利，所以我哋要做一半假嘅。點解我會分兩個部分拍？我首先同佢拍一部，跟住返德國拍我嗰部分，另外兩個故事，我中間有休息，休息完之後再返匈牙利再拍。其實我哋好多嘢都係喺匈牙利拍嘅。好期待！

記者： 頭先佢哋兩個都提到，其實Tony你揀呢套戲都係揀導演，都好鍾意佢之前嘅戲。

梁朝偉： 係呀。

---

（完）

#梁朝伟# #电影寂静的朋友# #腦神經科學家# #NG50次# #韓國派心# #被逼營業# #嘉玲讚好睇# http://t.cn/AXM2n3E0