阮浩棕唔介意何沛珈被人追 參唔參加《女神配對計劃2》賣關子
.
阮浩棕（18日）為TVB真人騷《魔音女團》首個見面會擔任活動司儀。對於舊愛何沛珈參加《女神配對計劃2》，問到佢會唔會參加埋一份，阮浩棕就話：「作為公司藝人，對節目組要尊重，參唔參加就唔講住，觀眾想知就要睇節目。」佢同時祝福五位參賽女神。

對於網上流傳指佢同何沛珈係假分手，阮浩棕坦言有留意到，最近社交平台都好多人Tag佢，佢強調兩人嘅關係：「一直係了解中嘅朋友，大家了解一段時間，就有共識要退一步。」佢續說：「其實佢喺IG回應咗一句，話我哋覺得唔適合，一段時間之後慢慢離開。我覺得呢句已經概括晒所有嘢，再講落去對參加者唔公平，可能會令想結識沛珈嘅人卻步，好似抹殺咗人哋嘅機會。」

問到係咪支持何沛珈參加節目結識新對象？阮浩棕表示支持，重申兩人係了解中嘅朋友，會想對方好。佢又話如果佢參加節目，何沛珈會「撳燈」：「可能佢純粹覺得我好耐冇上節目，如果有個節目畀人見到，何樂而不為？」再問佢會唔會參加《女神配對計劃2》重新追求何沛珈，阮浩棕就話：「人生有好多課題要處理，我同自己拍拖好開心，生活快活。」

#TVB[超话]##一分钟精选视频扶持计划# http://t.cn/AXxwoodr