王祖藍私下少同李家鼎聯絡：家和萬事興 囡囡客串兒童節目做「茄喱啡」
.
由王祖藍主演、以漸凍症為題材嘅電影《給我1天》，昨晚（18日）舉行慈善觀映會，英皇資本集團主席楊玳詩都有出席。祖藍身形發福唔少，佢笑言本來想減肥，但因為腸胃唔舒服，唔食嘢就會胃痛，結果越食越肥。

講到電影，祖藍話本來喺2022年上映，但因為疫情未完結，結果賣咗俾平台，所以當時冇正式喺香港上映。今次難得被漸凍人關懷協會用作慈善用途，用嚟鼓勵病友同照顧者。佢又笑話呢部係人生唯一一部文藝片，雖然冇機會呈現俾大家，但而家咁樣又有另一種意義。佢表示當年家人都有睇過電影，個個都感動到喊：「我當年同阿Sa（蔡卓妍）都做咗好多功課，又去畫畫，又同漸凍人交流，而真係漸凍人亦有演出，飾演我嘅親人，啱啱上年都離開咗嘅（吳）博君，佢都喺電影入面，啱啱再睇返都有啲回憶。」

講到工作，祖藍話而家回歸兒童節目，喺內地做「兒童音樂劇」，兩個女都有份做「茄喱啡」：「人哋嗰啲小朋友真係練好晒先嚟，你過嚟探班，唔可以搶戲，所以就俾佢哋客串幾個冇乜用嘅鏡頭。」祖藍又話兩個女喺演戲方面都有興趣，自己稍後會拍下一季，到時可能會俾一、兩集等佢哋試吓。

另外，問到有冇關心李家鼎？祖藍話兩人私底下比較少聯絡，只係喺媒體上見到發生咩事，不過佢覺得「家家有本難念的經，家和萬事興。」

#一分钟精选视频扶持计划##TVB[超话]# http://t.cn/AXxyP7uf