梁朝偉專訪丨曾自覺唔係好識演戲 拍《寂靜的朋友》靠6個月準備
.
梁朝偉（Tony）主演嘅新片《寂靜的朋友》近日上映，佢接受專訪時大談拍攝點滴，仲自爆曾經覺得自己「唔係好識演戲」。

偉仔話今次接拍係因為好友張叔平推介：「佢話呢個導演一定要拍，我睇完佢兩齣戲，第一齣《On Body and Soul》已經決定合作。」佢形容導演Ildikó Enyedi好有內涵、聰明又謙虛，第一次Zoom meeting已經覺得好啱Key，即場答應拍攝。

偉仔飾演神經科學家黃博士，為咗投入角色，佢用咗6個月時間做準備：「我幫自己洗腦，要相信自己就係神經科學家。」佢走去大學搵真正嘅神經科學家傾偈，了解佢哋嘅工作，仲要讀植物學、哲學嘅書。由於角色係香港人，受過英國教育，佢專登請咗英國老師練口音，但又唔可以太英式，要保持香港人嘅味道。

戲中偉仔嘅skinhead髮型非常突出，原來係導演嘅構思：「導演覺得我有些似僧人。」佢笑言最初以為係參考咗一位神經科學家嘅造型，後來導演喺歐洲Q&A時親口講，係因為見到佢僧侶嘅一面。

偉仔喺戲中有一段同樹嘅對手戲，佢貪玩試咗兩種演法：「一種係以植物專家身份望住棵樹，另一種係乜標籤都唔俾，就咁定定望住，好似佛教修行咁。」佢冇同導演講，自己玩吓睇吓得唔得。

偉仔同法國女星Léa Seydoux隔住電腦屏幕做對手戲，雖然分開拍，但其實兩人喺同一層樓，real time對住演。偉仔大讚Léa：「佢冇讀過電影，但係天才演員，魅力好勁，隔住個mon都咁犀利，如果面對面就不得了。」

偉仔透露原來劇本中黃博士有唔開心嘅往事，可能離婚或喪妻，仲有場戲想自殺。但當佢去到德國大學城拍攝時，導演覺得佢太開心樂觀，於是改走晒啲戲，角色變成冇交代家庭背景。

偉仔回顧演藝生涯，點名《悲情城市》同《阿飛正傳》係最重要轉捩點。侯孝賢啟發佢閱讀文學，而辛樹芬嘅非專業演出令佢發現自己「好多表演痕迹」。後來拍《阿飛正傳》最後一場，佢終於做到冇痕迹嘅演出，從此跟住王家衛20年。

偉仔話自己到而家仲成日去戲院睇戲，乜都睇，多數揀平日下晝冇人嘅時段。佢感嘆全球電影市道萎縮，串流平台搶走觀眾，戲院執笠：「我由細到大睇大銀幕，變到細銀幕，以前邊會有戲院執笠㗎？」佢特別懷緬細個喺碧麗宮睇《發條橙》嘅日子，話一輩子都唔會忘記。 http://t.cn/AXxIcvUS