胡楓94歲紅館開騷申請世界紀錄 為長者改日間演出：怕佢地凌晨等車
.
明年就迎嚟95歲嘅胡楓（修哥），今日（22號）出席「修哥九五至尊無限楓騷演唱會」記者會，宣布將於6月7號下午3點半，第六度登上紅館舞台。今次演唱會獲破紀錄嘅40間主辦單位支持，主辦方之一嘅陳淑芬更透露，已為修哥申請挑戰「舉辦演唱會最年長華語藝人」嘅健力士世界紀錄。

記者會上播出曾志偉嘅自薦影片，佢搞笑話：「修哥，聽講你6月7號又開show喎！九五至尊，無限楓騷，梗係粒粒巨星，記住預埋我呀！」修哥笑住話：「又係佢，我70歲開show，佢已經做嘉賓。」至於其他嘉賓名單，修哥就話主辦單位玩神秘，自己都未知，仲搞笑咁話：「就算上台都係啲曾孫，不過都係交俾主辦方負責安排，我只係專注音樂同唱歌。」

修哥話今次特登揀下晝開騷，全因為一個暖心原因：「以往夜晚開騷，聽過有位老人家等車等到凌晨一點，令到自己個心唔安樂，所以決定之後都日頭開騷。」問到會唔會勁歌熱舞，修哥就話：「老實講，勁歌就麻麻喇！熱舞就唔會喇！因為90幾歲唔可以郁動得太多，總言之就有娛樂性啦。」

修哥仲透露自己生活好有規律，幾十年來習慣夜晚12點先瞓，每日瞓足九個鐘，起身就會做運動：「會踢腿、扭腰、拉下筋。」問到會唔會再加場，佢就笑住話：「唔好喇啩？我都90幾歲，我都希望，不過唔知體力有冇。」
#TVB[超话]# http://t.cn/AXxaAX8f