施明設靈︱李泳豪不理李泳漢勸告帶老婆踩場 Agnes靈堂外罰企三鞠躬
.
藝人施明上月21日清晨因肺炎病逝，享年74歲，今日（22號）於大圍寶福紀念館設靈。獨力承擔喪禮事宜嘅長子李泳漢，多次表明為遵從母親遺願，堅持唔准弟婦、即係李泳豪嘅太太Agnes進入靈堂。不過李泳豪似乎冇理會阿哥嘅「勸告」，照樣帶埋太太Agnes同老爺李家鼎一齊抵達寶福山，三人都戴上口罩，神情憔悴。

當三人準備入靈堂時，Agnes即被工作人員阻止，只可以企喺門口等，全程不發一言，仲有專人睇住佢。Agnes喺靈堂外就好似罰企咁，藝人黃宇詩全程陪伴在側，即使現場有椅子佢都婉拒坐下。期間李泳豪曾經行出靈堂同老婆耳語幾句。雖然被拒門外，Agnes最終都行去靈堂門前合十同三鞠躬，然後先離開。被問到同奶奶關係、有冇唔開心，佢冇回應，只係喺友人陪同下離去。旁邊工作人員代為講咗句：「有咩心喺入面都講咗喇。」

而李家鼎明顯比之前消瘦咗好多，神情哀傷，被問到身體狀況佢冇回答。下午5時45分，李泳豪陪鼎爺短暫離開靈堂，落樓下抖氣，鼎爺全程手震震，之後有工作人員送上杯麵俾佢醫肚，兩父子不斷傾偈，然後再返回靈堂。期間有記者問到泳豪太太未能入靈堂可會失望，鼎爺只話：「今日唔回應喇！」再問到李泳漢唔俾細新袍入靈堂會唔會不近人情，鼎爺並冇回答。#TVB[超话]#