【25+英皇群星演唱会】终极阵容解锁
.
一直傳聞滿天飛嘅英皇啟德演唱會，今日終於有定案！英皇宣布張敬軒將參與5月3日及4日一連兩場喺啟德主場館舉行嘅「25+英皇群星演唱會」。據悉軒仔為咗留港演出，成功將原先安排嘅「Dahlia 系列」海外私人表演改期。佢話：「感謝客戶包容同體諒，最終可以留港出演英皇家族騷，亦非常感激公司一直不放棄為我協調檔期，當然最感激粉絲嘅包容同忍耐，好期待為大家表演。」

演唱會總監製劉偉強透露，流程大致敲定，共分十個章節，由眾巨星分別領軍。佢率先披露精彩內容：古巨基會用多首大熱歌創造新一代勁歌金曲，熱爆全場；李克勤除咗唱自己不同階段嘅金曲，仲會特別揀一首英皇娛樂出品嘅流行曲；陳慧嫻將聯同超過60人大型合唱團一同表演，氣勢磅礡。

Twins同關智斌會互唱對方嘅經典名歌；久未在香港演出嘅陳偉霆率領數十位舞者勁歌熱舞，仲會同世界跆拳道錦標賽冠軍、霆鋒徒弟林秋楠台上「比舞」。李幸倪則同泳兒、許靖韻、鄧小巧幾位實力唱將較技切磋；曾比特將同數支樂隊同台jam歌。Crossover驚喜不斷，異常精彩！

演唱會綵排已進入大直路，5月3日及4日嘅壓軸歌手分別為容祖兒及謝霆鋒。祖兒一晚唱快歌，一晚唱慢歌，係期間限定表演，佢更特別為演唱會排舞，以女皇姿態壓軸全場。霆鋒則趕得切由成都返嚟參與5月4日演出，為當晚壓軸獻唱。 http://t.cn/AXxaVWPY