周嘉洛回應《試真D》餐廳停業：網民俾面 跟馬貫東猜拳爭「萬歲」避過阿佘
.
周嘉洛同馬貫東今日（25號）到將軍澳出席《正義女神》「兩神對峙 詭辯之才」宣傳活動。周嘉洛近年喺內地人氣急升，被封為「大灣區男神」，不過佢受訪時就堅決否認，笑話：「靚仔大有人在，我係賣才華㗎！」馬貫東幫口話：「大灣區男神只係獎勵，佢唔會重視㗎。」

講到佢同江美儀、吳業坤、朱敏瀚等主持嘅TVB綜藝節目《試真D》，早前去惠州探店試咗一個118元人民幣嘅「7餸海鮮餐」團購套餐，江美儀狠批海鮮賣相似「灰甲」，仲要求食店退款，直話：「惠州政府要處理吓件事！」事後惠州市文化廣電旅遊體育局迅即介入，將涉事餐廳停業整頓，《試真D》更獲網民熱捧為飲食版《東張西望》。周嘉洛多謝大家關注節目，但就話《試真D》係個人意見較多，冇《東張》咁有使命感同深入探討。對於餐廳需要停業，佢話：「呢個犀利，證明佢哋察覺到問題，迅速處理。（你哋做到成績？）同我哋無關，係網民同觀眾俾面，同埋劇組嘅用心。」馬貫東就笑言最近冇工開，睇到節目自己都想去，又話節目好，可以改善行業。

另外，提到周嘉洛拍《正義女神》時不時「萬歲」，佢就謙虛話要等佘詩曼唔喺度，先同馬貫東偷偷地猜包剪揼，先有機會爭到萬歲嘅機會，相當搞笑。
#TVB[超话]#