仲有十日，就係我第一次嘅紅館個人演唱會。一個我已經放棄咗十幾年嘅目標竟然喺我46歲嘅時候達成。做番歌手嘅我，要以最好嘅狀態見大家，排舞，練聲，減肥，做gym 每日都排到滿滿。除此之外，我仲自資做新歌，第一首係Mark Lui 寫俾我嘅「万刀甲」，Mark 希望呢首歌可以激勵我，為演唱會做好準備，同時亦提醒我哋其實最可靠嘅人就係自己：如果我哋想得到一啲從未得到過嘅嘢，就要做一啲我哋從未做過嘅事。

今日要介紹我第二首新歌，亦係演唱會入面一首點題作品：「生活無小事」，我邀請咗Eric Kwok作曲。我一直都好欣賞Eric，可惜當我哋相識嗰陣，我已經冇再出唱片，今次難得有機會做番歌手，就一定要搵佢寫歌，加上以往合作好多嘅填詞人林若寧。「生活無小事」係想表達喺生活入面，冇嘢係微不足道嘅，每一件看似好細、好普通嘅事，其實都可以好重要。只要肯用心感受，幸福早就滲透我們每個生活日常，每日都有屬於自己嘅perfect moment。我好鍾意呢首歌，旋律簡單優美，歌詞浪漫直接，未錄首歌已經好打動到我，所以完成作品後決定自己製作MV ，入面加入好多感動自己嘅perfect moment ，希望你哋都會鍾意呢首歌，同我一齊，每日感受同發掘自己嘅perfect moment！

P.S 多謝我太太Maple，Katie 同傑仔幫忙完成呢個MV，特別多謝太太批准MV入面出現嘅家庭片段😜
#方力申[超话]##itsawonderfonglife##方力申最佳时间演唱会2026# http://t.cn/AXJWhoMk