#周柏豪[超话]#
高高低低中 reboot 自己 低處先係最大動力| SpotiTalk | PakHo 周柏豪| Tea Talk with Toby | Ep 54 | 流量年代生存法則

今集我請咗周柏豪，同佢由07年出道傾到𠵱家，氣氛輕鬆又真實。佢話入行廿年唔係一帆風順，經歷過好多高高低低， reboot 過好多次。

唱歌方面，鼻敏感令佢得半個鼻窿透到氣，每日朝早打一萬個黑鼽，上台前要噴藥，但噴得多又唔健康。加上無正式學過聲樂，一路靠摸索同碰壁，試過上台前驚到震，覺得自己唱得唔夠好，連自己都唔收貨。

疫情期間所有表演工作停晒，身為歌手冇show開、冇節目做，戴口罩拍嘢，個個保持距離。嗰段日子唔開心，但正正因為咁，令佢決心衝去另一個市場搵前所未有嘅機會。佢話低處其實係好大嘅動力。

佢唔覺得自己係明星，以前嘅明星要見唔到、搵唔到先珍貴，但𠵱家係流量年代，主動話俾人聽自己做緊咩先係常規。兩樣嘢冇高低之分，只係時代唔同咗。

高位係佢最忙嗰陣，但若果問佢𠵱家好啲定以前好啲，佢直認𠵱家俾到屋企人嘅生活質素遠遠好過以前。經濟能力係一回事，但幸福感同滿足感同錢完全唔掛鉤。

講起屋企人，佢語氣溫柔晒。太太Stephanie係智慧擔當，好冷靜、好多角度去解決問題；佢自己係衝動型，死衝爛衝到損晒都要達成目的。二人相識二十周年，太太由頭到尾都俾到好大安全感佢。

最後佢分享一個秘密夢想：雖然有畏高，但十年前試過孭住教練跳降傘，𠵱家想一個人由飛機跳落嚟，唔靠任何人，自己喺天空望住個世界。如果做到，佢會好proud of自己，覺得個世界會大好多。

转自ig：tobyleungchingki http://t.cn/AXJ3ROHe