TVB四子组队出戰HYROX 朱敏瀚帶傷上陣仍創佳績 张振朗透露将開劇
.
張振朗、周嘉洛、朱敏瀚同關曜儁四子組隊出戰HYROX香港賽，四人賽前備戰兩個多月，即使朱敏瀚早前踢波不慎斷韌帶，今次帶傷上陣，加上關曜儁剛完成雙人賽立即再戰，隊伍依然喺首次出賽下以1小時8分9秒完成賽事，賽後四人面不改容，狀態弗爆。周嘉洛笑言完成比賽已非常滿意，張振朗亦話成績超過本身能力，因為隊友有傷在身都咁搏。朱敏瀚喺鏡頭前紮紮跳，話腳傷冇影響表現，自覺跑得非常快，相信下次成績會更快。關曜儁起初以為朱敏瀚因傷落後，點知賽後睇紀錄，先發現朱敏瀚係全隊最快嗰個！不過朱敏瀚自爆體力分配唔夠，第二個項目已經差啲「爆偈」想嘔，忍唔住見到人就嘗試爬頭領先。

四子透露有計劃再戰8月嘅泰國曼谷賽，之後上海同深圳都想挑戰。張振朗希望繼續以呢個陣容出戰，最緊要係配合到大家時間，因為之後每個人都要開劇，會好忙，邊一站夾到就去。佢笑言最珍惜今次香港機會，有主場出戰嘅感覺，周嘉洛話：「支持者都多啲！頭先過程打氣都好熱烈！」

關曜儁賽前一天先同太太公布誕第三胎，佢笑言囝囝生性，冇同賽事撞期：「太太問我如果同一日生點算，我諗咗30秒，話當然陪你啦，比賽可以再比㗎！但我心裡好想出賽，因為同大家練咗好耐，比唔到真係好難搞。所以一切都係最好安排，前日出世啱啱好安排好所有嘢。」周嘉洛即取笑，太太懷胎十個月比佢備賽兩個月長得多，又話每日訓練見關曜儁又忙健身室工作，居然仲有時間生小朋友，非常佩服。關曜儁話想贏獎項送畀太太做母親節禮物，但對目前成績已好滿意，相信會越戰越勇。周嘉洛就話自己都有同滕麗慶祝母親節，每年都會送花畀親媽，雖然阿媽可能見到佢都嫌煩，但「不厭其煩地騷擾吓佢都係我嘅樂趣」。

張振朗早前領軍TVB藝人出戰內地籃球賽，佢話好開心不斷挑戰鍾意嘅運動，一星期可以訓練六日，見兄弟仲多過見家人。封視帝後年多終於宣布開劇，問積極運動係咪為新角色備戰，張振朗笑言做運動除咗為角色準備，都想為自己做多啲事，為健康同家人而做。
#TVB[超话]# http://t.cn/AXiLTUQl