歌手名單官宣欣宜冇份 竇靖童哈林驚喜亮相

內地王牌綜藝節目《歌手2026》下星期即將首播，官方16號正式公開9位首發歌手陣容，名單中不乏多位猛人，但大家事前估計會捲土重來嘅鄭欣宜就意外地冇出現喺名單中。

官方公布嘅首發9位歌手，包括68歲嘅台灣資深歌手齊豫、64歲嘅金曲歌王庾澄慶，呢兩位喺台灣樂壇輩份甚高嘅大前輩，出現喺名單中令人驚喜，另外亦包括金曲歌后魏如萱、全方位唱將胡彥斌、唱作才子周興哲、《中國好聲音3》冠軍張碧晨、《披荊斬棘4》冠軍尤長靖、美國靈魂樂歌手Stanaj，不過最令大家驚喜嘅一定係王菲嘅大女 竇靖童 都喺首發名單中。

名單官宣後，童童亦第一時間出post，問大家第一集想聽佢唱咩歌，音樂風格另類獨特嘅童童，會喺呢個主流舞台呈現點樣嘅演出令人期待。

欣宜去年原本亮相《歌手2025》，但因為綵排過程受傷而取消，大家都好期待欣宜今年可以捲土重來，不過大家都唔使失望住，因為節目賽制設有補位歌手踢館賽，欣宜上年原定都係以補位歌手身分出賽，所以今屆佢好可能都係以同一種身分亮相節目。