《模範律師團》陣容曝光 楊茜堯滕麗名強勢加盟 與羅嘉良奉旨鬥戲
.
無綫劇集《正義女神》收視口碑俱佳，總監製鍾澍佳乘勢開拍前傳《模範律師團》。據悉劇情時間線設於《正》劇約八年前，以陳煒角色嘅過去為主軸，戰場由少年法庭轉到成人法庭。除早前公布嘅陳煒、張曦雯、劉佩玥及羅嘉良外，再有兩大「王牌」楊茜堯及滕麗名強勢加盟，陣容令人期待。

劇集預計下月底開鏡，於中、港兩地取景。多年冇拍正劇嘅滕麗名，將與羅嘉良飾演夫婦，角色相當關鍵。兩人早於1997年《難兄難弟》結緣，但當時未有感情線，今次係首次正式合作。羅嘉良大讚阿滕記憶力強，並話：「之前成日喺影視平台睇到佢幫電影版《尋秦記》宣傳，亦知佢入圍金像獎最佳女配角，好戥佢開心，希望我哋多啲火花。」

楊茜堯劇中飾演羅嘉良嘅徒弟，喺律師樓同張曦雯、劉佩玥正面鬥法。佢曾於2003年《衛斯理》同羅嘉良合作，但對手戲唔多；2017年羅嘉良拍《與諜同謀》時本想搵佢做女主角，但當時佢合約就快屆滿，最終由李佳芯頂替。今次終於有機會「正面交鋒」，茜堯話「既緊張又期待」。佢透露之前演過律師，但呢次係新鮮挑戰。講到劇中鬥法，佢話每套劇都有唔同角色，名爭暗鬥一定有，人設好鮮明。因老公羅子溢都開緊劇，小朋友可能要交畀屋企人湊，暑假開工時會安排仔女嚟探班，順便當短旅行。
#TVB[超话]#