龔嘉欣反擊梁嘉琪拒談伍詠薇桃色秘史 黎耀祥幫口：唔需要太認真
.
黎耀祥、龔嘉欣今日到將軍澳出席《香港探秘地圖》宣傳活動。會上播出下週劇集預告，見到倪嘉雯發瘋狂追黎耀祥繼而捏頸，又一拳打落龔嘉欣腹部。二人接受訪問時話，倪嘉雯第一次拍呢類場口，唔太識就力，而佢哋寧願忍痛一次，叫倪嘉雯用真力演出，好過就力搞到要重拍幾次。龔嘉欣笑言好彩個肚入面冇嘢，否則會被打掉：「嗰陣又落大雨，大家都想快啲收工，同埋就咗幾次個效果爭啲，我就叫佢大膽啲，直接打落嚟！」黎耀祥話佢哋拍戲成日叫對手唔使客氣，寧願痛一次，好過少少痛但痛幾次。

近日龔嘉欣先後捲入梁嘉琪嘅雙面人指控同伍詠薇嘅桃色秘史，佢有備而來說：「我最近拍緊劇，唔係太留意啲新聞，但係我都有睇到少少。我就唔再多講啦，始終係另外一個電視台嘅節目，唔係好方便幫友台宣傳。我只能講嘅係，我冇經歷過佢哋講嘅嘢，我亦都唔知佢哋講緊邊個！」被問到伍詠薇講橫店嘅事，龔嘉欣話：「我唔係太清楚，問返佢會好啲！始終都係第二個電視台嘅節目，我都唔方便評論太多！」至於有冇覺得好無辜，嘉欣話：「都唔會嘅，唔緊要，娛樂圈成日都有新聞，我又唔會諗太多嘢，因為自己真係拍緊劇，只好專注做自己嘅工作。」對於倪嘉雯、關嘉敏等先後力撐佢為人，佢話：「其實每一部戲都拍得好辛苦，同事之間應該互相照顧、幫忙，正如祥哥成日教我哋拍戲唔係一個人，而係一個整體，大家都係想套戲好。」

對於近日連環爆出拍劇時被欺凌、邊個教人做戲等話題，黎耀祥笑謂近日冇乜新聞，「你哋唔覺嘅咩？所以唔關我事，我只係多口。呢行同邊一個人不和都講咗幾廿年，每一個階段都有人講。娛樂圈好多嘢都係一個話題，大家唔需要太過認真睇。是是非非從來都係呢個圈嘅話題，歌功頌德只係講兩日，但講是非就可以煲一個星期。就算係，好多嘢都過去咗，唔係啲大不了嘅事。我喺呢一行咁多年，每隔一段時間就會有呢啲炒作，所以唔需要太認真去對待。」
#TVB[超话]# http://t.cn/AXXWU3HM