【娛樂新聞】陳凱琳34歲生日發文護夫 否認鄭嘉穎「破防拉黑」：佢連社交媒體都未玩得熟
.
今日（23日）係陳凱琳（Grace）嘅34歲生日，佢趁正日親自喺社交平台發文，以幽默口吻為丈夫鄭嘉穎澄清一單網上熱話。事緣Grace近日喺《乘風2026》五公舞台上，同王濛合唱《獨家記憶》，兩人以黑西裝配白紗裙嘅互動造型被網民笑指似「婚紗照範本」，短片更喺B站突破百萬播放量，出圈效應驚人。大批網民隨即湧入鄭嘉穎嘅社交帳號，瘋狂洗版式貼上Grace同王濛嘅「婚紗照」截圖，仲搞笑留言「恭喜新人」、「送孩子去北京學滑冰」等。有網友聲稱自己因為貼圖而被鄭嘉穎拉黑，隨即令「鄭嘉穎破防了」呢個話題衝上熱搜，引發兩極討論。

對於呢場「拉黑風波」，Grace喺生日當日親自解畫，佢笑言：「如果是别人拉黑我可能会信，但要说郑嘉颖破防拉黑，我是不信的，因为……他对社交媒体的使用熟练度还远远不够哈哈！」佢更代夫澄清：「拉黑這件事真的沒做過，大家別誤會他啦～」同時透露今日會同家人一齊慶祝生日，並叫大家期待佢同姐姐們嘅五公舞台。

事件中，有輿論批評鄭嘉穎缺乏娛樂精神，亦有聲音認為網民過度玩梗、逾越家庭界線。陳凱琳今次高情商回應，既為老公護航，亦輕輕帶過風波，將焦點拉回家庭同生日，成功平息爭議。佢更藉機會多謝觀眾對舞台嘅喜愛，展現大將之風。 http://t.cn/AXScXf8P