【娛樂新聞】張崇德反擊博流量暗諷：關我咩事 否認係谷婭溦口中某位「大師」
.
張崇德早前拍片評論《中年好聲音4》惹來是非，之後《中4》評審之一嘅谷婭溦喺社交平台不點名批評某位「大師」藉佢博取流量，令網民猜測所指對象係張崇德。張崇德今日（21日）同兒子張日希到灣仔出席父親節活動時，回應事件：「事件已經完結咗好耐，我自己唔係好理，都有出聲明，唔想件事再發酵。但如果你睇，我而家繼續做緊，啲點擊率好高，大家就會知道佢講嘅係咪我呢？如果係講我就冇理由，因為我而家做緊嘅集數佢已經冇做。」講到谷婭溦隨後暫別《中4》評審工作，張崇德笑言自己冇咁大能力影響電視台：「佢自己post出嚟嘅嘢，如果係嘅話都係佢自己引發，關我咩事？我好無奈。」

至於《中4》有心水參賽者，佢坦言有，但之後都有失手，又覺得有啲人其後表現更好。佢認為賽期長達九個月，有人會因為唔同因素迷失，希望各參賽者能夠搵到自己唔好嘅地方去改進，又透露有參賽者睇完佢網上嘅影片後私訊多謝佢嘅意見。

提到父親節，崇德透露已同家人食飯慶祝，指近兩年都會以part-time形式叫囝囝幫手做助手拍片兼影相，對囝囝表現非常滿意。囝囝現正修讀媒體相關課程，但冇興趣入行，崇德都開心，因為做幕前好辛苦。問到囝囝將來會唔會向導演或攝影師方面發展，佢話有可能，自己下月去馬來西亞工作都會帶埋佢，等佢接觸更多唔同地方嘅人。 http://t.cn/AXScWGHy