▪️一波三折嘅劇本，即便係打和都令人番尋味！備受命運與濃嘅伊朗，無論內外因素影響之下依然能夠踢出水準已非常唔容易，最後結果係點就交俾個天。擔任隊長嘅泰利美（Mehdi Taremi）嘅十二碼判罰係有點牽強，而佢自己操刀宴客就當「回禮」俾對手。至於雷沙爾安（Ramin Rezaeian）補射追和就十分精彩，呢位36歲嘅嘅攻防意識都值得一讚。中堅卡利薩迪（Shoja Khalilzadeh）補時嘅入波經VAR「復桌」確定越位半隻腳板，的確可惜。而一分鐘後伊斯杜拉希（Saeid Ezatolahi）嘅頭槌又中楣，似乎註定伊朗今仗三分無緣。

埃及需要經歷領先、被追和、被反吸、再被VAR推翻到同一起跑線，對心臟功能嘅需求絕對唔差得過體能。雖然賽前手執四分，但深知最起碼攞番一分會更穩陣。沙巴（Mahmoud Saber）比賽開始無耐就射穿比蘭芬（Alireza Beiranvand）大細龍門，只不過就好難想像往後發展會如此慘烈。除咗佢以外，翰尼（Mohamed Hany）、艾堤亞（Marwan Attia）、蘇比亞（Mostafa Shobeir）同查斯古特（Mahmoud Trezeguet）踢得唔錯，相反沙拿（Mohamed Salah）表現麻麻，57分鐘就被換出。

▪️放棄傳控嘅比利時，反而踢得更好。當然還要感謝杜古嘅大B比預產期早出世，可以提前歸隊踢「生死戰」，人齊嘅「歐洲紅魔」自然更具殺傷力。此役托沙（Leandro Trossard）踢出星級水準，兩粒入波都顯示功架。上一仗表現好好嘅迪布尼（Kevin De Bruyne）同左閘迪古柏（Maxim De Cuyper）都繼續有好表現；事實亦證明盧卡古（Romelu Lukaku）更適合以後備身份登場。另外中場雲拿根（Hans Vanaken）以及後備上陣嘅沙利瑪卡斯（Alexis Saelemaekers）喺比賽尾段速率之快，令體能下降嘅紐西蘭難以招架。

紐西蘭能夠入波不至於食蛋，伊利查查斯（Elijah Just）居功至偉，呢位華裔翼鋒亦都攻入個人今屆賽事第三個入波，係球隊26人當中最耀眼嘅一員。面對比利時全場23次攻門，當中哥甘比（Max Crocombe）作出最少5次成功封阻都已經盡曬人事；至於缺乏支援嘅基斯活特（Chris Wood），都好難有更多作為。

賽後比利時以淨勝球優勢躍升到分組首位，而次名出線嘅埃及，就高喺淘汰賽迎戰D組第二名澳大利亞。該組嘅最終走勢，亦都令塞內加爾獲得晉級資格。

*附G組分組積分排名

世界盃分組賽事賽果-
Group G
埃及🇪🇬1-1🇮🇷伊朗
紐西蘭🇳🇿1-5🇧🇪比利時

#世界杯[超话]##FIFA World Cup 2026# 🇺🇸🇨🇦🇲🇽#世界盃分組賽##埃及球迷俱乐部[超话]##伊朗球迷俱樂部##比利时球迷俱乐部[超话]##紐西蘭球迷俱樂部#